Sangha khawi chungchanga harsatna Minister in sawi

Associated Chambers of Commerce and Industry of India (ASSOCHAM) buatsaihin nimin khan India ram pum huap Webinar neih a ni a, he hunah hian Mizoram-a Fisheries Minister, K. Lalrinliana chu khual zahawm niin a tel a ni.

Webinar-ah hian Minister, K. Lalrinliana chuan COVID-19 hrileng vanga Mizoram chhunga Sangha khawitu ten harsatna an tawhte sawiin, Sangha no khawi tur leh a chaw lakluh kawnga harsatna thlen dan te, Lockdown vanga Sangha Dil enkawl that theihloh a tam thu leh hemi vanga Sangha thar a tlem phah a rin thu a sawi a, Central Sawrkar in PMMSSY Scheme thar a siam behchhan in Sangha khawi a eizawnna leh a hralhna kawngah Mizoram in ngai awh chho a, a hma aia lian zawk leh mumal zawka hmasawnna a hmuh a beisei thu a sawi bawk.

Fisheries Minister chuan Mizoram chhunga Sangha chaw siamna atana pawimawh bawlhlo awm dan zirchian a pawimawh thu leh zir bingna kalpui a tul thu pawh he hunah hian sawiin, heng Sangha chaw siamna bawlhlo te hmundang atanga lak ringawt a nih chuan Mizoram tan Sangha chaw siamna kawngah intodelh a har dawn thu leh Sangha thar hnem a har tur thu te a sawi a, chutiang bawkin Sangha note tharchhuah lamah hmalak a tul thu a sawi bawk.

He hunah hian Sangha Dil siam bakah Mizoram-in hma thar a lakna chi hrang hrangte pawh Minister hian sawiin, Lui Sangha humhalh chungchanga khawtlang mipuite nen tangruala hma an lak ho dan te, Mizoram-a Sangha no keu tir dan tur leh Mizoram-a Sangha awmsa khawi dan tur te, Sangha mawi chi khawi tura hmalak tumna awm te a sawi lang bawk a. Central Sawrkar atanga sanction hmuh tlai leh installment a hun taka a thlen thin loh avanga State Sawrkar-in Scheme/Programme Implement na-ah harsatna an tawh thin thu te pawh sawiin, PMMSSY-ah chuan a kalhmang siam tha turin Union Minister chu a ngen bawk.