Thenzawl Bazar sakna tur en

Serchhip bial-a zin Adviser to Chief Minister, C. Lalramzauva chuan nimin khan Thenzawl khua tlawhin khawtlang hruaitute leh an Party hruaitute nen Thenzawl Field Veng-a Bazar sakna tur hmun an enfiah.
Thenzawl Field Veng-a Bazar sakna tur hmun hi a zim avang leh kawngpui a hnaih deuh nia hriat a nih avangin a bulhnaia hmun awl zau zawkah sawn turin sawrkar-ah ngen mek a ni tih Thenzawl khawtlang hruaitute chuan Adviser to Chief Minister hi an lo hrilh a. Adviser to Chief Minister, C. Lalramzauva chuan Thenzawl leh a chhehvel mipui te chhawr tangkai tur Bazar sak bul tan theih a ni chho ta chu lawm-awm a tih thu sawiin, a sakna tura ruahmanna hmasa, khawtlang in sawn an duhna chu awm a tihpui thu leh a sakna hmun sawn tura theihtawp chhuaha hmalak mek anih thu leh thil tulte tihfel tep anih thu a sawi bawk.
Cheng nuai 150 senna tura ruahman Then-zawl Bazar tur sak bul tan hna hi a thawk tura thlan, Lushai Engineers chuan an thawk tan tawh a. An sak tumna hmun hi a zim vang leh kawngpui a hnaih lutuk vangin a bul mai  Supply Department hmun hlui tho, mipuiin Bazar Building awmna tura an lo mitthla thinna hmun zawka sa turin Thenzawl Joint YMA bultumin, Thenzawl khaw-tlang chuan an ngen nia thudawn a ni a, sawrkar lam hotute pawhin a hmun hi tlawhin an enfiah tawh bawk a ni.

Comments

Chhiar Hlawhte