ZPM ten mipui sum thawh hmanna puanzar an phut

ZPM chuan CM Relief Fund for COVID-19 chu renchem taka hmangin a hmanna puanzar nise an duh thu an sawi.

Inrinni-a thuchhuah an siamah ZPM chuan sawrkar thuchhuah a tarlan a nih danin CM Relief Fund for COVID-19 atana sum lut zawng zawng chu Juy 23, 2020 thlengin HDFC Bank Account-a pung Rs. 2,20,784/- chhiar telin cheng vbc. 20.26 a tlin tawh thu leh CO-VID-19 hrileng avanga tanpui ngaite tanpuina leh bungrua mamawh leina atan Rs. 12,43,37,049/- hman tawh niin, cheng vbc. 7.8 a la ban thu leh sawrkar hnathawkte July thla hlawh puk sak leh tura ruahman mek bawk tih an tarlang.

ZPM thuchhuah chuan kan sawrkar in COVID-19 doletna pual bik atan hian sum a dawng tam tawh hle nia tarlangin, a hmanna pawh a tam tawh hle bawk tih an tarlang a. Hetih rual hian a hmanna te mipuiin kan hriat ve zel tur a nih laiin sawrkar erawh chuan mipui beisei angin a puangzar ta chiah lo nia sawiin, pawi an tih thu an tarlang a. Sum renchem chhuanlama chanchin-bumite hreka advertisement an tihhniam vak laiin chanchinbu aia darhzau lo zawk pamphlet chhutna atan Rs. 1,053,000/- lai sen anga tarlan chu copy engzatnge siam a nih a, khawi Press-ah nge chhut a nih a, khawiahnge semdarh a nih pawh tarlan a ni leh si lo chu mak an tih thu an tarlang bawk.

Hetianga mi inphal ten mimal leh pawl anga COVID doletna atan cheng vbc. 20 chuang lai an chhunglut chu thil lawmawm tak a nih thu pawh tarlangin, “Mipui rilru-ah rinhlelhna awm thei turin sawrkarin Ruling Party workers te hnenah contract hna a pe chhuak reng bawk si a, Minister thenkhatte lahin sawrkar thil tih tur hraw pui pui an la sawi reng bawk. Heng baka SEDP atana sum dah thahnem tham tak khawih chet loh a la ni leh zel te hi sawrkar hian sawifiah turin ZPM chuan a phut bawk a ni,” an ti bawk.