Mizoram-ah hri kai 3 hmuh belh; 17 an dam thung

Niminpiah-a Mizoram-a Swab Samplen enfiah atangin COVID-19 hri kai mi 3 hmuh belh leh an ni a, Mizoram-a hri kai hmuhchhuah chu 398 an tling tawh. Niminpiah khan ZMC Laboratory-ah Swab Sample 157 enfiah niin heng atang hian hri kai mi 3 hmuhchhuah an ni a, heng hri kai hmuhchhuah te hi Aizawl District mi vek niin mipa pakhat leh hmeichhia 2 niin kum 26-40 inkar a upa, Uttar Pradesh, Bihar leh Delhi atanga lo haw te an ni a. An vai hian Quarantine Facility-a awmlai leh natna lanchhuahna neilo te an ni.

Niminpiah vek khan Lunglei-a TrueNat khawl-ah Sample 30 enfiah niin hri kai hmuhchhuah thar an awm lova, Rapid Antigen Test (RAT) hmangin Aizawl-ah Sample 1 leh Serchhip-ah Sample 5 test niin hri kai hmuhchhuah an awmlo bawk a ni.

Mizoram-a COVID-19 hri kai enkawl mek zingah nimin khan Serchhip District atangin mi 4 leh Lawngtlai atangin mi 11 leh Aizawl District-a mi 4 te chu enkawl dam niin anmahni enkawlna hmun atanga chhuahtir an ni thung a. Hei bakah hian CIJW School, Vairengte-a hri kai hmuhchhuah Millitary Hospital, Masimpur (Assam)-a enkawl chu Assam-ah sawn a ni bawk a. Heti hian tun thlengin Mizoram-ah COVID-19 hri kai hmuhchhuah mi 398 awm tawhin mi 234 enkawl dam an ni tawh a, tunah hian hri kai enkawllai mi 163 enkawl mek niin State dang-a thawnchhuah pakhat a awm ta bawk a ni.

India ramah COVID-19 hri kai la pung zel

Darkar 24 kalta chhung khan India ramah COVID-19 hri kai mi sing nga chuang hmuhchhuah thar an awm leh a, hei hi ni khat-a hri kai hmuhchhuah an tam ber ni nia hriat a ni a, hri kai enkawl dam pawh mi nuai 10 an chuang tawh bawk. Ministry of Health & Family Welfare chhinchhiahna atanga a lan danin darkar 24 kalta chhung khan India ramah sample 4,46,642 enfiah leh niin heng atang hian hri kai mi 52,123 zet hmuhchhuah leh an ni a, heng te nen hian India rama COVID-19 hri kai hmuhchhuah zawng zawng chu 15,83,792 an tling tawh a ni.

India rama hri kai zingah hian mi 10,20,582 te chu enkawl dam ni tawhin hei hi hri kai hmuchhuah atanga chhutin zaa 64.44 an tling a, tunah hian hri kai enkawllai mi 5,28,242 an la awm bawk a, hri kai enkawllai aiin enkawl dam hi 4,92,340 in an tam zawk a ni. India rama hri kai zingah hian darkar 24 kalta chhung khan nunna chan mi 775 an awm leh a, heng te nen hian nunna chan zawng zawng chu 34,968 tling tawhin hri hi hri kai hmuhchhuah atangin zaa 2.20 an tling tawh bawk a ni. ICMR chhinchhiahna atanga a lan danin tun thlengin India ramah Sample enfiah chu 1,81,90,382 an tling tawh a ni.