Maxi Cab chuanman ti sang chungchangah hma la

Tunhnaiah Serchhip District chhungah Maxi Cab chuanman tisang an awm nia hriat a nih avangin Serchhip District Transport Officer (DTO) hnenah hemi chungchang hi thlen a ni.
Hemi chung-changa Serchhip District Consumer Association hruaitute hnen atanga thu kan dawn danin COVID-19 vanga rei tak inkharkhipna kalpui anih hnuah inkhuahkhirhna te hlip thena Sumo (Maxi Cab) te Serchhip District khaw hrang hrang atanga Aizawl lama an tlan tan leh hnuah Ser-chhip District chhunga khaw thenkhat Serchhip, North Vanlaiphai, East Lungdar leh Mual-cheng-a Sumo Service te chuan Maxi Cab chuanman tura sawrkar thuneitu, State Transport Authority thuchhuah kalhin an lo tisang tih hriat a ni tih an sawi a. Hemi chungchangah hian District Consumer Association bakah E. Lungdar, Mual-cheng leh N. Vanlaiphai-a Consumer Union Branch te chuan mipuite tan hmalain Serchhip DTO-ah complaint an thehlut ta a ni.
Hemi chungchangah hian Serchhip DTO, B. Lalrinsanga chuan hma an lak nghal thu kan Palai hnenah sawiin, niminpiah lam khan heng khaw hrang hrangah Maxi Cab neitute pawh biakpawh an nih thu leh mahni thu thu-a rate tih-san theih a nih loh thu leh a hmaa rate awmsa chu zawm tura hriattir an nih thu a sawi a. Hei bakah hian Maxi Counter nghaktute pawh biak an nih thu sawiin, Maxi Cab neitu ten rate tihsan an tum a nih pawhin lo daltu tur an nih thu hrilh an nih thu leh, hetianga an zawm lo a nih chuan an License thlenga Cancel sak thei an ni tih pawh an hrilh thu a sawi bawk.
Serchhip District Consumers Association hruaitute chuan Mizoram sawrkar in May 22, 2018-a thuchhuah a siam angin Maxi Cab chuan-man State Transport Authority in a ruahman chu mi pakhat tan Metalled road-ah KM khat zelah Rs. 2.50 leh Unmetalled Road-ah KM khat-ah Rs. 2.75 zel a nih thu an sawi bawk.

Comments

Chhiar Hlawhte