Chanchin thar thenkhat :

Vantlang inthiarna tifai

Tlawmngai pawl pakhat, Cod Nerc chuan nimin khan Thenzawl khawchhung-a Vantlang inthiarna hmun tihfai hnatlang an nei. Thenzawl Civil Sub-Division-a SDO, Kulothungan A, chuan tun thla ni 14 khan Thenzawl khua chu Pawnler-a inthiar awmlohna mai bakah vantlang inthiarna nei tha, Open Defecation Free Plus (ODF+) ah a puang a, hemi denchhen hian nimin khan Sawrkar hriatpui NGO - Cod Nerc-a thawktute chuan Thenzawl khawchhung Veng hrang hranga vantlang inthiarna hmun te thian faiin, hnatlang an nei a, anmahni sum senga lirthei hmanga tui leiin, an tleuh fai vek bawk a ni.
Cod Nerc Chairman, C. Lalmuan-thanga chuan, Thenzawl khua ODF Plus-a puan a ni chu lawmawm an tih thu sawiin, heng vantlang inthiarna hmunte chu tute emaw enkawl tur bik chauh ni lovin, mipui vantlang in a tihfai kawngah mawhphurhna an nei a ni tih lantirna leh inzirtirna atan leh ODF Plus a puan an nih lawmna ni paha hnatlanga vantlang inthiarna hmunte hi tifai an nih thu a sawi bawk.

Lawngtlai-ah kumin hian TB thihpui 3 awm tawh
Kumin chhungin Lawngtlai District-ah TB natna kai zingah thihpui mi 3 an awm tawh. He thu hi Lawngtlai District TB (Tuberculosis) Forum thutkhawm nimin a neih ah tarlan a ni a, he huna tarlan a nih danin nikum (2019) khan Lawng-tlai District-ah hian TB kai enkawl dam mi 141 awmin nunna chan mi pakhat a awm a, kumin ah June thla thleng khan mi 63 enkawl dam ni tawhin nunna chan mi 3 an awm tawh thung a ni. TB damdawi ei that loh vang leh chhan dang vanga damdawi in hna a thawh that theih lohna, Drug Resistant TB (DR-TB) damlo Lawngtlai District-a mi 8 hmuhchhuah ni tawhin mi 4 chu enkawl dam an ni tawh a, mi pakhat thi tawhin mi pathum enkawl mek an ni bawk. Nimin a he thutkhawm hi Lawngtlai DC, Dr. Andrew H. Vanlaldika chuan a telpui a ni.

MP thar lalut dawn
Mizoram Rajya Sabha MP atana thlan thar, K. Vanlalvena chu Vawiin hian Rajya Sabha Member atan lakluh a ni dawn ta a, Rajya Sabha Member thar lakluhna inkhawm hi New Delhi ah neih tur niin K. Vanlalvena hian Thawhtanni khan New Delhi a pan tawh a, hri len lai a nih avangin amah in New Delhi-ah hian a kal a ni.

Lirnghing tuar te tlawh tan
Champhai South bialtu MLA, TJ. Lalnun-tluanga chuan a bial chhung a fan zawh hnuah nimin atang khan East Tuipui bial-a lirnghing tuartute a tlawh a, nimin khan Leisenzo, Leithum, Dungtlang, Samthang,Vaphai leh Farkawn khuate tlawhin an khawtlang hruaitute a kawm bakah chhawmdawlna thilpek a hlan nghal bawk a ni.

Champhai Damdawi In tlawh
Champhai North bialtu MLA leh Health and Family Welfare Board Vice Chairman, Dr. ZR. Thiamsanga MLA chuan nimin khan Civil Hospital Champhai-a Truelab Quattro Real Time Quantitative Micro PCR khawl bunna tur siam mek a tlawh a. Chief Minister zahawm tak leh Health Minister thahnem ngaihna avanga reilote ah COVID-19 test-na khawl Civil Hospital Cham-phai a bun a ni mai tur chu thil lawmawm tak anih thu te, he khawl hmang hian COVID-19 mai bakah natna dang dang Cancer, Hepatitis, Malaria bakah natna hrang hrang hriat theih anih tur thu te, he khawl dinna tura Chief Minister leh Health Minister te hmalakna chu fakawm a tih thu a sawi bawk. Hei bakah hian Dr. ZR. Thiamsanga chuan damlo na zual te enkawlna tur High Dependency Unit (HDU) pawh tlawhin ICU pawh a dahna tur building sak mek zawh anih veleh tihpuitlin nghal a nih tur thu a sawi bawk.

Siaha-ah ART Centre hawng
Nimin khan Siaha District Hospital-ah Anti-Retroviral Therapy (ART) Centre thar chu Siaha DC, Bhupesh Chaudhary IAS chuan a hawng a, ART (Anti-Retroviral Therapy) hi HIV Positive te enkawlna damdawi niin HIV hrikin taksa a khawihchhiat tur a ven bakah, midang kaichhawn theihna a ti tlem a ni. India ramah nikum  Financial Year-ah khan ART 50  din tura ruahman a ni a, Mizoram in 2 changin Siaha leh Serchhip-ah te ART Centre hi din tura ruahman a ni.

Ration Card 2,72,806 awm
Food, Civil Supplies & Consumer Affairs Department-in an chhinchhiah danin, Mizoram-ah Ration Card 2,72,806 a awm a, mihring hming 12,36,761 a lang. Ration Card zingah hian Antyo-daya Anna Yojana (AAY) Ration card 25,988 awmin, mihring hming 76,542 a lang a. Priority Households (PHH) Ration Card 129,566-ah mihring hming 61,6717 langin, Non-NFSA Ration Card 117,252 awmah mihring hming 543,502 a lang a ni.

Cheng vbc. 20 chuang lut tawh
Nimin thleng khan COVID-19 hri leng dona atan CM Relief Fund-ah cheng vbc. 20.22 zet lut tawhin hetah hian CM Relief Fund HDFC Bank account-a pung (interest) Rs. 2,20,784 chu a tel a. Tunah hian Rs. 12,43,37,049/- chu hman ni tawhin sum hmanbang cheng vbc. 7.78 ala awm mek a ni.

Comments

Chhiar Hlawhte