Hmeithai In sak sak mek

Serchhip-VIII Village Council leh Serchhip P&E Veng-a tlawmngai pawl hrang hrangte chuan tunlai hian an huamchhunga Hmeithai pakhat chenna In tur an sak sak mek.
Serchhip P&E Veng huamchhunga tlawmngai pawl hrang hrang leh Serchhip-VIII Village Council te hian an huamchhunga hmeithai pakhat chu an chenna In a chhiat tawh avangin Nilaini khan an In hi thiah sakin hnatlang in an sak that sak mek a, Ser-chhip-VIII VC te chuan he In sakna atan hian sum leh pai neihsa an neih loh thu sawiin, an In hi a chhiat tawh avang leh luahzui ngam chi a nih tawh loh avangin sawrkar thuneitute hnenah tanpuina dilin hei hi la hmu lo mah se In hlui hi thiatin a sak that hna hi an thawk tan tih an sawi.
In sakna atan hian Rs. 1,20,000/- hmuh an beisei thu leh hemi in a daih bak chu MGNREGS atanga mipui thawhkhawm hmanga hnawhkhah tur a ni tih sawiin Serchhip-VIII VC te chuan, bialtu MLA Lalduhoma chuan Rs. 20,000/- leh Roman (Catholic) Father in Rs. 8000/- thawh bawkin, hei bakah hian vengchhung-a mi thahnem takin sum fai leh bungrua an thawh tih an sawi a. Hetiang hian a hma lamah pawh hmeithai pahnih chenna In tur an lo sak sak tawh tih sawiin, tuna an In sak mek hi Assam Type, a dung ft. 18 leh a vang ft. 12-a zau-a sak a ni dawn tih an sawi bawk.
Serchhip-VIII VC te chuan he In sak hna thawk tur hian P&E Veng Branch YMA hnuaia Section hrang hrang pathum te a inchhawk-a an thawh mek thu sawiin, harsatna dang a awm loh chuan tunkar hi chuan sak zawh theih an inbeisei thu an sawi a, YMA bakah hian MUP Member te pawh hnatlang-ah hian thawkchhuakin MHIP Member ten hnatlang-a thawkchhuak te hi ei leh in an buatsaih sak thin bawk a ni.

Comments

Chhiar Hlawhte