Mamawh zat Grape hmu lo

Hnahlan Grape Growers’ and Processing Cooperative Society chuan kumin chhung hian kuthnathawktute Grape tharchhuah quintal 1000 chuang lei an tum a, an mamawh zat erawh lei tur an hmu dawn lo niin an sawi.
Hnahlan Grape Growers’ and Processing Cooperative Society hruaitute hnen atanga thu a dawn danin tun din-hmunah Grape rah hi quintal 500 chuang an lei tawh a, Grape rah hi kg. khat Rs. 50 zelin an lei a, an leina man hi an hmunah an pe nghal zel a ni. Society hruaitu te chuan kumin hian Grape ching an tlem avangin an duh khawp lei tur an hmu dawn lo niin an sawi a, Winery a zem lian an neih 22 zinga a chanve 11 emaw a um/dah khawp chauh lei tur an hmu dawn niin an sawi.
Hnahlan Grape Growers’ and Processing Cooperative Society hruaitute chuan a hmaa Winery atanga an siamchhuah 'Zawlaidi' aia quality tha leh tui zawk kumin atanga siam an tum niin an sawi a, a hming atan 'Isabella' vuahin a hmaa ENA hmanga Grape um 'Fortified Wine' ang kha ni lovin tunah chuan thiamna sang zawk hmangin Grape thlumna la chhuakin Wine hi an siam dawn tih an sawi a, a hma aiin tlemin a man pawh a to deuh dawn niin an sawi bawk.
Hnahlan Winery hruaitute chuan Hnahlan leh a chhehvel chu wine tur chinna hmunah puan nise an tan hmalak a awlsam zual sawt dawn niin an sawi bawk.

Comments

Chhiar Hlawhte