Chief Minister hovin Road and Infrastructure Development Board thutkhawm neih a ni

Nimin khan Chief Minister, Zoramthanga hovin Road and Infrastructure Development Board chu thukhawmin Mizoram chhung kawng siamthat leh tihhmasawn zelna tura Board hmalakna tur pawimawh hrang hrang an sawiho.

Chief Minister Office-a he thutkhawm ah hian Chief Minister, Zoramthanga chuan Road and Infrastructure Board chuan Mizoram chhung kawng siam leh enkawl bakah building leh hmasawnna ruangam, infrastructure tihhmasawnna hna te chu Mizoram sawrkar sum hmanga thawh a ni emaw, sawrkar laipui sum hmanga thawh a ni emaw, a hmunah enfiah a Contractor te hmalakna enzui chu a hna pawimawh tak pakhat a nih thu a sawi.

Chief Minister chuan Mizoram-a Highway pawimawh tak tak te chu sawrkar laipuiin contract a pekte thawh a nih thu a sawi a; tun dinhmunah pawh hmun pakhata kawng siamthat hna thawh mek chu contractor ten labour harsatna an tawh avanga hna an tan theihloh avangin lirthei in harsatna an tawh thu leh, chumi avang chuan State sum hmanga enkawl tur ni miahlo mahse, mamawhna a nasat em avangin state sawrkar sum hmanga Temporary-a thawm that hna thawh a nih thu a sawi a. Nakin zelah hetianga tih ngai hi a awm tawh loh nan a hunlaia uluk takin invil a enzuipui pawimawh thu sawiin, hna tha thawh a nih ngei theih nan a tul a nih chuan Board chuan nawrpui tura hma pawh la mai tur a nih thu member te chu a hriattir bawk.

Chief Minister chuan Fur ruahtui tla chu kawngin a tawrh phah nasat thin avangin tun dinhmunah pawh kawng chhiat avanga mipui chak lakna kawng pawimawh tak takte chu kaltlang theihlohna a awm mai loh nana hmalak chu tuna pawimawh hmasa a nih thu a sawi bawk.

He Meeting hian Kawng siam leh tihhmasawn lama state mamawh ang zela awmze nei taka hmalak chhoh zel a nih theih nan Decade Plan (2021-2030), kum sawm chhunga hmalakna tur, mamawh dan indawt a ruahmanna siam chungchang te sawiho niin Board inkaihhruaina, Terms of Reference chungchang te sawiho a ni bawk a. Board Member te chu kawng enfiah tur, Inspection Team pahnih ah then in, a remchang hmasa ber a chetchhuah nise an ti bawk