Chanchin thar thenkhat :

Sub-Hqrs. YMA din belh dawn

Mizoram-a District pathum (3) hawn belh a nih hnuah Central YMA chuan heng District pathum-a hian Sub-Hqrs. YMA din tumin hma a la mek a, Sub-Hqrs. YMA din dan tur zirchiang tura Central YMA in a din, Study Group te chuan Inrinni khan Hnahthial tlawhin Study Group Convener, Lalnuntluanga chuan Central YMA chuan District thar pathum Hnahthial, Saitual leh Khawzawl-ah Sub-Hqrs. hawn a remti tawh tih a sawi a, kumin YMA Day hma khan din fel vek tum a nih laiin hripui leng avangin duh anga chaka hma lak theih a nih takloh thu a sawi a. An zir-chianna chu CEC-ah thlenin August thla velah chuan Sub-Hqrs. YMA hi hawn theih beisei a nih thu a sawi bawk. Hetihlai hian Saitual Group YMA Executive thukhawm chuan Sub-Hqrs. YMA din a nih dawn tak avangin Saitual Group YMA chu thiah an rel tawh bawk a ni.

Malaria vangin 2 thi tawh

Health & Family Welfare Department hnuaia State Vector Borne Disease Control Programme (SVBDCP) chuan COVID-19 hripui leng karah Malaria leh Thosi in a thlen theih natna hrang hrang Dengue, Japanese Encephalitis, Filaria leh Chikun-gunya dona kawngah hma a la zel a. Chhinchhiahna atanga a lan danin kumin January thla atanga June thla tawp thleng khan Mizoram-ah Malaria vei mi 3720 hmuhchhuah ni tawhin mi 2 in an thihpui tawh a, Dengue natna vei mi 18 hmuhchhuah ni tawhin nunna chan erawh an awmlo thung.

Journalist boral ralna hlan

Mizoram sawrkarin Accredited Journalist boralte ralna a pek thin Ex-Gratia (Rs.1,50,000/-) chu Inrinni khan July 27, 2019-a boralta DK. Lalhruaitluanga (1980-2019), Editor, Rihlipui Daily Newspaper nupui, Laldinpuii hnenah Mizo-ram sawrkar aiawhin Champhai DIPRO, Dr. Lallawmkima chuan a hlan a. Mizoram sawrkar chuan Accredited Journalist boral te chu Rs. 1,50,000/- leh Non-Accredited Journalist boral te Rs 1,00,000/- in a ral thin a ni.

Zirtirtu 2 dah belh phut

Tuichangral Zirlai Pawl (TCZP) chuan an bial chhung Govt. Lungkawlh Middle School-ah zirlai 60 chuang awm chunga zirtirtu 3 (pathum) chauh an awm chu pawi an tih thu an sawi a. Sawrkar in zirlaite harsat na hria a School Session tan hma ngei a zirtirtu 2 (pahnih) tal pe turin an ngen tih an sawi a, School Sesion tan hun pawha zirtirtu pahnih tal sawrkar in a pe thei lo a nih chuan Lungkawlh khuaa sawrkar Office leh School zawng zawng tiamchin awm lovin khar an tum thu an sawi bawk. Govt. Lungkawlh Middle School-ah hian School Session hmasa khan zirlai 67 awmin zirtirtu pali in an enkawl a, February ni 20 khan zirtirtu pakhat a pension tak avangin zirtirtu pathum chauh hi an awm ta niin an sawi.

MJA in ramri-a duty tlawh

Mamit District tlawha zin MJA Kolasib District Member te chuan Inrinni khan Kan-hmun-a ramri venhim hna thawh dan an enfiah a, Kanhmun-ah hian Tripura leh Assam atanga Mizoram-a rawn lutte chu uluk takin Screening neih thin a nih thu Dr. Lalbiaknunga chuan lo hrilhin State sawrkarin inkharkhip a thlahdul hnuah Kanhmun kaltlanga tangkhang lo lut te hi nitin mi 10 vel awm ang an ni a, Mizoram an rawn thlen hnuah an awmna tur District-a Quarantine Facility-ah dahluh nghal thin niin bungrua pawh inbanlek-a lakluh thin a ni. Kanhmun khuaa ramri-ah hian Duty Post 2 awmin, Police leh Health Department atangin duty an awm reng a, YMA in an tawiawm bawk a ni.

Ngharchhip-ah Heroin man

Mizoram Police leh Assam Rifles te chuan Zirtawpni zan khan Hnahthial District-a Nghar-chhip khuaah Heroin tam tham tak an man. Thu-dawn danin Heroin man zawng zawng hi Kg. 1 leh gram 934 (hawng 120) a ni a, cheng vbc. 1.54 chuang hu niin a neitu ni a puh, Duhkima (62) leh a fapa, Remthangpuia (33), Ngharchhip khua te chu man an ni a. Ramri kan tura lui an hleuh kai laiin Heroin hawng 20, cheng nuai 15 hu vel an thlauh palh bawk nia sawi niin an pahnih hian thubuai siamsak an ni a, tun tum hi Mizoram-a tumkhata Heroin man hnem ber nia rin a ni.

Buhfai phur Truck chesual

Bairabi FCI Kudam atanga Serchhip Kudam a buhfai dah tur rawn phurtu Truck (Mz-01/P-8627) chu nimin chhun dar 12:00 vel khan Bak-tawng Chan In-ah chesualin kawngthlang-ah a tlanliam-a, he Truck hian buhfai bag 310 rawn phurin a khalhtu Lalrinchhana leh Handyman, Lallawmkima, Teirei Forest ve ve an chuang a, an pahnih hian hliam tuarin Thingsulthliah dam-dawi In panpui an ni a, ngaihtuahawm erawh an ni lo. He Motor in a phurh buhfai te hi nimin vek khan thiarchhuah nghal a ni bawk.

Rajya Sabha MP thar in Secretary te kawm

Mizoram Rajya Sabha MP thar, K. Vanlalvena chuan Zirtawpni tlai khan Union Ministry of Earth Science-a Secretary, Dr. Rajeevan chu New Delhi-a a Pisa-ah kawmin Proposal pahnih a thlen a, tunhnaia Mizoram khawchhak lama lirnghing thin a hmuna enfiah tura Investigation Team tir turin a ngen bawk. Hemi hnu hian K. Vanlalvena hian Ministry of Tribal Affairs-a Secretary, Deepak Khandekar pawh kawm lehin Mizoram sawrkarin Project a lo thehluh tawh, Lockdown avanga Pending Project pahnih chu a bawhzui nghal bawk a ni.