Serchhip-a eirawngbawlna Gas leh tuialhthei rawn thleng te uluk taka enfiah thin a ni

Serchhip-a Legal Metrology Enforcement Staff te chuan sawrkar kum liamta chhung khan tuialhthei leh eirawngbawlna Gas rawn phurh thlen thahnem tak bakah sumdawng ten bukna leh tehna an hman hrang hrangte an enfiah bawk.

Serchhip-a Legal Metrology Enforcement Staff te hian sawrkar kum liamta, nikum April thla atanga kumin March thla tawp thleng khan Serchhip-a eirawngbawlna Gas rawn phurh thlen Truck Trip 155 enfiahin heng zinga Trip 2 chu buk tling lova an rawn phurh thlen avangin a rawn phurtu Driver chu hrem an ni a. Petrol leh Diesel rawn phurh thlen Truck Trip 148 pawh enfiah niin rawn phurh thlen tur zat rawn phur thleng lo driver pakhat chu hrem niin Diesel leh Petrol rawn phurtu Truck pakhat ve ve te chu a nih tur ang a nih loh avangin thuneitu, District Bawrhsap kutah hlan an ni a, heng Truck te hi DC hian load an lakna (Silchar) lamah a thawnlet nia thudawn a ni bawk a. Hei bakah hian Serchhip District chhunga dan lova a man to-a eirawngbawlna Gas zuartu mi pakhat manin District thuneitute kutah hlan a ni bawk a ni.

Sawrkar kum liamta chhung khan Legal Metrology Enforcement Staff te hian bukna leh tehna hmanrua 516 enfiahin sumdawng leh Driver Dan bawhchhia mi 24 an man a, an zinga mi 21 te chu Dan angin hremna pawisa chawitir an ni a, midang 3 erawh chu thuneitu sang zawk hnenah hlan an ni bawk a. Sawrkar in kum 2019-2020 chhunga Chhiah hmu tura a bituk chu Rs. 1020/- in an khum bawk a ni.

Legal Metrology Enforcement Staff te hian Serchhip Bazar-a Sa zuartute chu Dan anga an bukna te a khaina siam vek tura tiin hei hian zawm pawh a hlawh viau a, amaherawh chu Bazar Building hi sak that-a luah luh anih hnuah zawmlo an awm leh tawh tih sawiin, heng mite pawh hi Dan zawm-a an bukna hi khai leh vek tura hriattir an nih thu an sawi bawk. Legal Metrology Enforcement Staff te hian Health Department-a Food & Drug Administration te nen dan lova Sikret lakluh thahnem tak an man bawk a ni.