Mizoram khawchhak lamin lirnghing an tuar zui zel; Sawrkar in chhawmdawlna hna a thawk mek

Mizoram khawchhak lam tlangdung khaw hrang hrangte chuan lirnghing avanga harsatna an tawk zui zel a, heng lirnghing tuartute hi District Disaster Management Team te bakah sawrkar mi pawimawh te pawhin tlawhin tanpui hna thawh nghal a ni a, Vawiin hian Doctor rual te pawhin khawchhak lam hi an pan leh dawn a ni.
Kumin June thla chawhnu lam atanga lirnghing tuartu East Tuipui bial khaw hrang hrangte hi Zirtawpni tlai dar 3:56 khan lirnghing magnitude 4.3 a nain a sawi lehin zan dar 10:04 khan magnitude 5.3 bakah zan dar 10:12 leh zan dar 10:34-ah Magnitude 3.7 a nain a sawi leh bawk a, Lirnghing intanna hi Samthang leh Farkawn khaw ramchhung vel niin tarlan a ni. Hetianga lirnghing an tawrh leh avang hian mi tam tak chuan an In leh lo chhuahsanin khawlai-ah an riak leh a, Inrinni khan khaw thenkhat ah chuan mipui riahna tur Buk sak leh a ni bawk.
Inrinni vek khan Champhai District Bawrhsap, Maria CT. Zuali hovin District Disaster Management Team Emergency Meeting neih niin Team hrang hrang 7-ah inthenin lirnghing tuar khaw 27 tlawhchhuah dan tur an duang nghal a, heng khaw hrang hrangah hian Solar Light, First Aid Kit, Tui thianghlim in tur leh sum fai tanpuina an pe nghal zel a ni.
Tuipural khaw hrang hranga lirnghinna hmun te hi Sports Minister Robert Romawia Royte, Champhai North bialtu MLA Dr. ZR. Thiamsanga, East Tuipui bialtu MLA Ramthanmawia leh Lawngtlai East bialtu MLA H. Biakzauva te chuan tlawh nghalin mipuite harsatna a hmunah an en bakah damlo leh lirnghing avanga harsatna neite a tul anga buaipuiin damdawi leh tanpuina hrang hrang an hlan a. Sports Minster Robert Romawia Royte chuan lirnghing tuartute chu sawrkarin a tawrhpuiin a ngaihsak reng tih a sawi a. Dr. ZR. Thiamsanga leh amah zuitu Medical Team te chuan Khawbung-ah damlo leh lirnghing vanga harsatna nei mi 46 te dinhmun enfiahin, damdawi a thlawnin an sem nghal zel bakah Khawbung PHC tan tanpuina pawisafai a hlan bawk.
Health Minister, Dr. R. Lalthangliana chuan Health Department hnuaia Daktawr rual te chu Team 3-ah then in lirnghing in a ngawng khua zawng zawng an tlawhchhuak vek dawn tih a sawi a. Heng Team khat-ah hian mi pathum (3) zel awmin Vawiin hian Aizawl chhuahsana Champhai District an pan tur thu a sawi bawk.

Comments

Chhiar Hlawhte