Union Minister for Food Processing in Zoram Mega Food Park a hawng

Union Minister for Food Processing, Harsimrat Kaur Badal-i chuan Khamrang-a cheng vbc. 75 senga din, Zoram Mega Food Park chu nimin khan Video Conferencing hmangin a hawng a. Zoram Mega Food Park hawnna thuziak, Plaque chu Union Minister aiawhin Commerce & Industries Minister, Dr. R. Lalthangliana chuan a pawt pharh a ni.

Zoram Mega Food Park hawnna Programme hi NIC Video Conferencing Room, Treasury Square-ah neih niin he hunah hian Harsimrat Kaur Badal-i chuan Prime Minister Modi a kaihhruai Sawrkar chuan hripui leng karah pawh kawng hrang hrangah ram intodelhna turin hma a la a, chung zingah chuan ei leh in sawngbawl (Food Processing) pawh telin nasa taka Ministry in hemi kawngah tan an lak thu a sawi a. Zoram Mega Food Park chuan Food Processing kawngah Mizoram chu bung tharah a kai tir ngei a rin thu sawiin, Mizoram a kuthnathawktu ten an tharchhuah man man zawka an hralh theih a rin thu leh Food Processing lama eizawng duh thalaite tan remchanna tam tak a siam sak ngei a rin thu te pawh a sawi a. Mizoram-in a tharchhuah te hlawk zawka a tihpun kawngah leh kuthnathawktute sum lakluh tihpun kawngah te Zoram Mega Food Park chuan thui tak kawngro a su thei nia sawiin, Hmarchhak-ah a Ministry in project 88 a kalpui mek tih sawiin chung zinga 7 chu Mizoram-ah kalpui mek a nih thu a sawi bawk.

He hunah hian Minister of State (Independent Charge), Ministry of Development of North Eastern Region (DoNER), Dr. Jitendra Singh pawhin Mizoram chu State te ni mahse State dangin Mizoram atangin zirtur an nei, tiin chung zingah chuan ziak leh chhiar tam dan te, mipuiin Sawrkar an tawiawm that dan te leh khawtlang leh Sawrkar tangkawpin hripui an dona kawngah hmalak dan te chu a sawilang a, hengte hi State dangte tan a entawntlak tih a sawi a. Food Processing lamah Mizoram in Potential a neih chu Food Park kaltlangin nasa takin kawng thar tam tak a in hawn ngei a beisei tih a sawi bawk.

Union Minister of State for Food Processing Industries, Rameshwar Teli pawhin ei leh in sawngbawl lamah tun hmaa duh anga a sawngbawlna hmun ram in a neih tam loh avangin Food Processing lamah hmasawnna a thuanawp thu sawiin, Food Processing lamah ram in hma a sawn nan Mega Food Park hi Ministry in a duangchhuak tih a sawi bawk.

Zoram Mega Food Park hawnna hunah hian Commerce & Industries Minister Dr. R. Lal-thangliana chuan Zoram Mega Food Park chu Food Processing kawnga Mizoram in mellung pawi-mawh tak a kai tharna a ni tih a sawi a, Sawrkar Flagship programme SEDP nen pawh a thil tum te a in zulin loneitute leh kuthnathawktute pawhin an hlawkpui a beisei tih a sawi bawk. 

NH-54 hrula Khamrang-a din, Zoram Mega Food Park Pvt. Ltd hi ram acre 55 a zau-ah cheng vbc. 75.20 senga din niin cheng vbc. 50 chu Ministry tum niin a bak chu Board of Directors te tum a ni a. He Food Park-ah hian inhmantawm thei khawl leh bungrua changkang leh tunlai tak tak bun a ni a. Chungte chu 1000 MT dah theihna Cold Storage te; 3000 MT dah theihna Drywarehouse; darkar khat zelah 2 MT sawngbawl thei Aseptic Pulp Line, Canning, Aseptic leh Tetra packing thei; darkar khat zelah 40 MT sawngbawl thei Ripening Chamber te; darkar khat zelah thil tihro theihna te, Food Testing Laboratory leh Food Processing lamah hman theih thil dangte a awm a ni.

Nimin-a he hun hmanna ah hian Lok Sabha MP, C. Lalrosanga bakah P&E Minister, Tuirial bialtu MLA leh sawrkar mi pawimawh dangte an tel bawk a ni.