Keifang-ah MCAB Branch thar hawn a ni

Tawi bialtu MLA leh P&E Minister, R. Lalzirliana chuan nimin khan a bial chhung, Keifang khua ah Mizoram Cooperative Apex Bank Ltd. (MCAB) Branch thar a hawng.
MCAB Keifang Branch hawnna hunah hian P&E Minister, R. Lalzirliana chuan Apex Bank Branch thar chu Keifang khaw mipui tan leh a chhehvel tlangdung a cheng ten an chhawr tangkai a beisei thu sawiin, tunhnaiah Apex Bank-in hmasawnna neia a kal chho zel chu lawmawm a tih thu a sawi a. Apex Bank chu Mizo te Bank, Mizoram mipui tana ding a nihna anga mipuite rawngbawl tura hmasawn zel turin duhsakna a hlan a. Mi rinawm leh taima tan Bank chu pawisa thawhchhuah tlem lua awm lova dahkhawlna, eizawnna atan leh leirem rahna atan loan lak theihna a nih avangin mi tam tak tan malsawmna thlentu a ni, tiin Mizoram Cooperative Apex Bank Ltd., Keifang Branch Office hnuaia ATM Booth a hawng nghal bawk.
Mizoram Cooperative Apex Bank Ltd., Keifang Branch hi Mizoram-a Apex Bank Branch 21-na a ni a. Apex Bank hian tunhnaiah kawng hrang hranga hmasawnna neiin, kum 10 chuang zet an hlep pawh a thang chho zel a ni. Tunah hian hnathawktu nghet 159 nei mekin, thawktu zawng zawng hi Mizo vek an ni a. Keifang Branch hawn a nih hnu hian Mizoram District tinah Branch an nei ta a ni.
Apex Bank hlawkna leh hamthatna awm thei zawng zawng hi Mizo mipuite sum mamawh phuhruk nan puk tir thin a ni a, deposits za zela 70 lai a puk tir tlangpui tih he hunah hian tarlan a ni bawk.

Comments

Chhiar Hlawhte