Hualtu khua Green House Cluster-a Tomato chin hralhchhuah turin Dy. Speaker in a vailiam

Horticulture Department hmalakna a Serchhip District chhung, Hualtu khua in Green House Cluster-a Tomato an chin chu nimin khan a rah sengin hralh tura thawnchhuah a ni a, he hun hi bialtu MLA leh Assembly Deputy Speaker, Er. Lalrinawma chuan a hmanpui a ni.

Hualtu khua in Green House Cluster-a Tomato an chin sengkhawm leh hralhchhuah tura vailiamna puala inkhawm tawi nimin-a Dilphaizawl hmun-a an buatsaih ah hian bialtu MLA leh Assembly Deputy Speaker, Er. Lalrinawma chuan a bial chhunga Green House Cluster siam a ni leh Tomato hmun te siam a ni chu lawmawm a tih thu a sawi a, he hmalakna ah hian Kuthnathawktute leh Department lam mi ten theihtawp an chhuah tih sawiin, chung hmalak tlanna avanga a hlawhtlinna hmuh theih a ni ta chu bialtu MLA a nihna anga lawmawm a tih thu a sawi a. Hei bakah hian sawrkar in hripui leng kar-a ei leh bar harsatna a thlen lohna tura hma a lakna te pawh a tarlang bawk.

    He hunah hian Serchhip Division Horticulture Officer (DHO), M. Vanlalzami chuan Hualtu khuaa Tomato ching tura hma an lak dan sawiin, Hualtu khua-a Dilphaizawl ram ah hian kum 2018 khan Dragon Fruit chu Cluster-a ching turin a hmun hi en a ni a, amaherawh chu Dragon Fruit chinna atan chuan a Zo lutuk a ngaih a nih avangin Seedless Mandarin Orange Cluster atan hmang turin Proposal thehlutin kum 2019-ah chhungkaw 17 te chuan hma an la zui ta nghal a. Hemi hnu hian a huho-a Green House dahna hmun atan a tha nia hriat a nih avangin nikum khan Proposal siam leh niin phalna pek nghal an ni a, a tirah chhungkaw 10 thlanchhuah niin tuipuitu an tam vak lo mah se tunah chuan chhungkaw thahnem tak an awm tawh thu a sawi a. Kumin March thla khan Green House hi sak zawh niin hmalakna hmasa atan thlai chi khat chin in a hralhna lamah awmzia a neih theih dan te zirtirin a hnuah Tomato chin dan leh enkawl dan hrang hrangte zirtir leh an ni a, kuthnathawktu ten thuawih taka an zawm avangin tunah chuan a hlawhtlinna hmuh theih a ni ta tih a sawi bawk.

Hualtu khuaa Tomato chinna atan hian Sq. ft. 100-a zau Green House 20 sak niin chhung-kaw 10 ten pahnih theuh an enkawl mek a, tunah hian a dang 21 pawh sak leh tura ruahman mek a ni a, Green House pakhat hi Rs. 1,38,000/- man niin tunah hian Rs. 27,60,000/- sen ni tawhin Arka Samrat leh Arka Rakshak te chin a ni a, Fur zual lai, June leh July-ah te Mizoram ang ruahtui tamna ah Tomato hi tharchhuah a harsat avang leh a man san hunlai a nih avangin hetiang hian hmalak niin nimin khan nimin khan quintal 40 chuang zet an thawnchhuak a ni.