Mizoram-ah hri kai hmuh belh zel an la ni

Inrinni thleng khan Mizoram-ah COVID-19 hri kai hmuh belh zel niin hri kai hmuhchhuah hi 284 an tling tawh.

Sawrkar thuchhuah in a tarlan danin Zirtawpni khan ZMC Laboratory-ah Swab Sample 160 enfiah leh niin heng atang hian COVID-19 hri kai 10 hmuhchhuah leh an ni a, heng hri kai hmuhchhuah thar te hi puitling kum 21-50 inkar bakah naupang kum 7 mi te an ni a, Aizawl District mi 5, Champhai District mi 2 leh Siaha District mi 3 te niin Bihar, Assam, Delhi, West Bengal, Rajasthan, Uttar Pradesh, Assam leh Maharashtra atanga lo kir an ni. Hri kai hmuh-chhuah thar zinga mi 4 te chu hnamdang, NDRF mi leh sa, Quarantine lai an ni a. Mi 3-in symptoms neiin midang 7 erawh in hri kai lanchhuahna an neilo thung. Zirtawpni vek khan Lunglei Civil Hospital TrueNat khawl-ah Sample 43 enfiah niin hri kai hmuhchhuah erawh an awmlo thung.

Inrinni khan ZMC Laboratory-ah Sample 148 enfiah leh niin heng atang hian hri kai mi 2 hmuh belh leh an ni a, heng hri kai hmuhchhuah te hi hnamdang mi 2, mipa leh hmeichhia niin New Delhi leh Bihar atanga rawn kir an ni a, Quarantine lai leh Symtom neilo an ni. Inrinni vek khan Lunglei Civil Hospital-a TrueNat khawl ah Sample 36 enfiah leh niin hri kai erawh hmuh belh an awmlo thung.

Mizoram-ah hri kai hmuh belh mek an nih lai hian Inrinni khan Kolasib District-a hri kai enkawl chu hri a kai tawhlo tih nemnghah a nih hnuah DCHC atanga chhuahtir a ni a, heti hian Kolasib District-ah hri kai enkawllai an awm tawh lova, Saiha District-a hri kai mipa 1 leh hmeichhe 5, an vaiin mi 6 chhuah tir ni bawkin Mizoram pumah hri kai hmuhchhuah mi 284 awmin mi 167 te chu enkawl dam an ni tawh a, tunah hian enkawllai 117 awmin District 4-ah hri kai enkawllai an awm tawhlo a ni.

India ramah hri kai hmuhchhuah an pung zel

Darkar 24 kalta chhung khan India ramah COVID-19 hri kai hmuhchhuah thar 38,902 zet an awm leh a, hei hi nikhat-a hri kai hmuhchhuah an tam ber tum a ni leh. Ministry of Health & Family Welfare chhinchhiahna atanga a lan danin darkar 24 kalta chhung khan India ramah Sample 3,58,127 te enfiah leh niin heng atang hian hri kai 38,902 te hi hmuhchhuah an ni a, heng te nen hian India rama hria kai hmuhchhuah hi 10,77,618 an tling ta a ni. India rama hri kai hmuhchhuah zawng zawng atang hian mi 6,77,422 te chu enkawl dam ni tawhin hei hi hei kai an hmuhchhuah  tawh atanga chhutin zaa 62.86 an ni a, tunah hian hri kai enkawllai 3,73,379 awm mekin hri kai enkawllai aiin enkawl dam hi 304,043 in an tam zawk a ni.

Hri kai hmuhchhuah zingah darkar 24 kalta chhung khan nunna chan mi 543 awm lehin heng te nen hian hri kai nunna chan mi 26,816 an tling ta bawk a, hei hi hri kai zawng zawng atanga chhutin zaa 2.48 an ni bawk. ICMR chhinchhiah danin India rama Sample test tawh zawng zawng chu 1,37,91,869 a tling tawh bawk a ni.