Serchhip District-a COVID-19 hri kai enkawl mi 5 damin mi 4 te chhuahtir an ni

Dedicated COVID Health Centre (DCHC) Serchhip-a COVID-19 hri kai enkawllai mi 5 te chu hri lakah an fihlim vek ta a, an zinga mi 4 te chu nimin khan DCHC atang hian chhuahtir an ni. Serchhip-a COVID-19 hri kai te enkawlna hmun, DCHC Serchhip-a awm mi 5 te hi an Swab Sample lak-a enfiah a nih hnuah hri lakah an fihlim tih nemngheh niin nimin khan an zinga mi 4 te chu chhuahtir an ni a, nimin-a chhuahtir tak te hi tun thla ni 9-a DCHC Serchhip-a dahluh BSF sipai 2, tun thla ni 17-a dahluh Bihar atanga rawn haw Assam Regiment Sipai pakhat leh tun thla ni 21-a ZMC atanga Serchhip DCHC-a enkawl tura rawn dah Assam Rifles sipai te an ni a, hri kai enkawl zinga Civil mi 1, Nagaland atanga rawn haw leh tun thla ni 17-a Serchhip DCHC-a dahluh erawh In lama inkhunghranna tur hmun remchang a awm rihloh avangin chhuahtir ala ni lo thung a, heng midang 4 te hi an chhuah hnuah a remchan anga mahni In lama la inkhunghrang rih tura tiin nimin khan enkawl dam an nihna Certificate hlanin chhuahtir an ni ta a, an chhuah hma hian RAT hmangin an thisen enfiah leh vek an ni bawk.

Serchhip District-ah hian COVID-19 hri kai hmuhchhuah mi 7 awm tawhin ZMC atanga enkawl tura rawn thawn mi 14 nen an vaiin mi 21 enkawl an ni tawh a, nimin-a chhuahtir tak te nen hian mi 9 te chu enkawl dam-a chhuahtir niin tunah hian Thenzawl-a COVID Care Centre (CCC)-ah 11 te chu enkawl mek an la ni thung a, Serchhip DCHC-ah mi pakhat enkawl mek ala ni bawk.

Nimin vek khan Serchhip District chhung sawrkar hmunhmaa inkhunghrang mi 10 te chu inkhunghranna hmun atanga chhuahtir an ni leh bawk a, heti hian tun dinhmun-ah Serchhip District-ah hian inkhunghrang mi 67 an la awm mek a, heng zinga mi 55 te hi sawrkar hmunhmaa inkhunghrang te niin COVID Care Centre (CCC), Thenzawl-ah mi 11 leh Serchhip-a Dedicated COVID Health Centre (DCHC)-ah mi pakhat inkhunghrang an la awm a, mahni In lama inkhunghrang awm tawh lo thung. Sawrkar hmunhmaa inkhunghrang te hi Tourist Lodge, Ser-chhip-ah mi 6, P&E Rest House, Bukpui-ah mi 7, Sainik School, Chhingchhip-ah mi 12, Tourist Lodge, Thenzawl-ah mi 6, Eklavya Model Residential School, Serchhip-ah mi 23 leh Highway Restaurant, Chhiahtlang-ah mi pakhat te an ni.

Serchhip atang hian nimin khan Sample 38 te chu ZMC Laboratory-a enfiah tura thawn leh a ni bawk a, heng te hi zanin lam hian an result hriat nghal theih beisei a ni bawk.