Self-Employment Programme (SEP) hnuaia Loan la tur tan Serchhip-ah Training buatsaih

National Rural Livelihood Mission (NULM) hnuaia Serchhip khawpui chhunga Self-Employment Programme (SEP) atanga Individual Enterprise Loan la turte tana Entrepreneurship Development Programme (EDP) Training chu niin khan Serchhip Auditorium-ah neih tan a ni.
Khawpui-a cheng mirethei ten eizawnna nghet an neih theihna tura Self-Employment Programme (SEP) hnuaia Individual Enterprise Loan la turte tana Training hi Serchhip District Urban Development Officer, Vanthangpuii chuan hawngin kum dangah pawh SEP loan hi pekchhuah a nih tawh thin thu leh kumin ah erawh hripui leng avanga loan pawh pekchhuah theihloh a hlauhawm laia Loan pechhuak thei tura hmalakna chhunzawm a ni leh District hrang hrang zingah a hmasa ber atana Serchhip District-a EDP Training buatsaih a ni chu lawmawm a tih thu a sawi a. He ruahmanna hi khawpui-a miharsa leh eizawnna nei mumallo ten eizawnna nghet an neiha sumdawnna tenau te an din theihna tura ruahman a nih thu sawiin, SEP hnuaia Loan pekchhuah te chu zaa 7 chin Loan latu ten an rulh tur a nih thu leh a chunglam erawh chu Department in an rulh tur a ni tih sawiin, kaihhruaina mumal tak hnuaiah a dawng turte pawh thlan thin an nih thu a sawi bawk.
District Urban Development Officer (DUDO) chuan SEP Loan dil tur hian thiamna bituk a awmloh thu leh amaherawh chu Loan diltu ten hma an lakna tur an ruahman ah thiam bikna neih a tul a nih erawh chuan tanpuina pek an nih hmain Training pek hmasak a tul thu a sawi a. He Loan la tur hian dahkham ngailo tura tih ni mah se Bank lamin kalphung an neih ve thin avangin dahkham a lo ngai a nih pawha lo inring turin a chah a. Loan pekchhuah zingah rul thalo leh anmahni pawhin an thin pui ngai hial an awm thin thu sawiin, hei hi thalo a tih thu leh Loan la te chuan rulh ngei ngei chu an tihtur a ni tih an hriat a tul thu a sawi bawk.
Kumin hian Serchhip District chhungah SEP Loan hmu tur hian mi 71 thlanchhuah niin heng mite hian cheng nuai 2 thleng eizawnna an dinna turin Loan pekchhuah an ni dawn a, heng mite tana Training hi UD&PA Department leh Aizawl West College-a Centre for Entrepreneurship Development (CED) bultuma neih niin Aizawl West College-a Associate Prof. V. Zothankhuma chuan a kaihruai a, Training hi ni 2 chhung neih tura ruahman niin hemi chhung hian Aizawl West College-a CED atangin Prof. B. Lalrinsanga leh UD&PA Department Serchhip-a NLUM District Manager, Lallawmzuali bakah Bank lam aiawh ten zirtirna an pe dawn a ni.

Comments

Chhiar Hlawhte