Chanchin thar thenkhat :

Hri kai leh enkawl dam awm

Niminpiah-a ZMC Laboratory-a Swab Sample enfiah atangin COVID-19 hri kai mi 11 hmuhchhuah leh an ni a, heng mite hi Aizawl District mi 10 leh Lawngtlai District mi pakhat te an ni. Aizawl District-a hri kai hmuhchhuah 10 zinga 6 hi BSF sipai niin Mizoram Police pakhat leh Civil mi pathum an tel bawk a, State pawn atanga rawn lut te vek niin Lawngtlai District-a hri kai hmuhchhuah hi Assam atanga rawn lut hmeichhia a ni thung a. An vai hian Quarantine Centre-a awmlai leh natna lanchhuah dan la neilo te an ni. Hetihlai hian nimin khan CO-VID-19 hri kai mi 17 te chu enkawl dam an ni thung a, heti hian nimin thleng khan Mizoram-ah COVID-19 hri kai hmuhchhuah chu mi 395 ni tawhin mi 215 enkawl dam an ni tawh a, mi 180 te chu enkawl mek an la ni bawk.

CM hovin Admission sawiho

Nimin khan Chief Minister, Zoramthanga hovin a Pisa-ah hripui leng in Mizoram chhunga College admission chungchanga harsatna a thlen theih dan sawihona neih a ni a, he hunah hian Higher & Technical Education Minister, Dr. R. Lalthangliana bakah Higher & Technical Education Department Commissioner, Finance Commissioner, Higher & Technical Education Official te, DP&AR Official te leh IASE Principal-te an tel a ni. Hemi hmalam hian sawrkar chuan Sawrkar College leh Private leh Kohhran College te chu a theih anga tam zirlai admit dan lo ngaihtuah turin alo ngen bawk a ni.

Lunglei-ah Review Meeting nei

Lunglei District huamchhunga Department zawng zawng ten hmasawnna hna an thawh hrang hrang zirhona leh hmalak ngaite sawihona turin nimin atang khan ni 2 awh Review Meeting chu Lunglei HPC Conference Hall-ah neih tan a ni a, he hunah hian Department hrang hrang ten a mal te te in an hmalakna leh hmachhawp te an sawi a, he hun hi HPC Vice Chairman, Lawm-awma Tochhawng MLA chuan a telpui a ni.

Aizawl DC in FIR thehlut

Myanmar atanga Mizoram-a rawn lut nu pakhat leh a fapa lakah FIR thehluh a ni. Thudawn danin niminpiah zing lam khan Myanmar atangin nu pakhat, a fapa nena Myanmar a an chhungte tlawha zin chu thuneitute phalna la hmasa lovin Aizawl-ah an lut a. Dan a bawhchhiat avang hian Aizawl District Bawrhsap Pu R.Lalramnghaka, Chairman, District Task Force on CoVID-19, Aizawl District ni bawk chuan The Mizoram (Containment and Prevention of COVID-19) Ordinance, 2020 hnuaia hrem turin Kulikawn Police Station-ah FIR a thehlut ta a ni. Heng nufa leh a lo hmuaktu a pasal te hi Quarantine Centre a dah nghal an ni bawk.

P&E Minister in tlawh

P&E Minister, R. Lalzirliana chuan niminpiah atang khan Champhai District chhung Tuipui-ral khaw hrang hrang lirnghing tuarte chu an khua ah a tlawh mek a. Chief Minister hmalakna in lirnghing tuar khuate tan Solar Street Light 100 chu Tuipuiral khaw hrang hrangah sem anih tur thu Minister chuan sawiin, YMA Branch te chu phungbawmah sawmin, sem tur 100 bakah chah lawk 71 te nen avaiin Solar Street Light 171 an ken thu a sawi a. Solar Study Lamp pawisa pek lawk tawh 855 an ken tel thu pawh sawiin, heng baka 945 dang an rawn kente pawh Subsidy rate-in lirnghing tuarte hnena an pek tur thu a sawi bawk.

Sum ruahman ti danglam

Chief Minister's Relief Fund atanga COVID-19 Awareness Pamphlet print-na tura CM Office in Rs.10,53,000 a lo sanction tawh chu Rs. 9,00,020-ah tidanglam a ni a, hei hi Rs. 3/- zela copy nuai 3 chhutna tur leh Challan man Rs. 20/- a ni tih sawrkar thuchhuah in a tarlang.