COVID-19 hri kai mi 14 te Serchhip District-a enkawl tura rawn dah an ni

ZMC-a COVID-19 hri kai hmuhchhuah mi 14 te chu Serchhip District chhunga enkawl tura rawn dah niin nizan hmasa khan Serchhip District rawn thlenpui an ni.

Serchhip CMO, Dr. Laldawngliana Sailo leh IDSP-a District Surveillance Officer, Dr. Lalhlupuii te hnen atanga thu kan dawn danin tunhnaiah Mizoram-ah hri kai an pun zel avang leh Aizawl District-a COVID Care Centre (CCC) te chu mumal taka la kalpui a nih loh bakah ZMC chu COVID-19 hri kai leh natna lanchhuahna nei tawh te enkawlna tura ruahman a nih avangin heng hri kai enkawllai mi 14 te hi Serchhip District chhunga CCC leh DCHC-a enkawl tura tih an ni a, an zinga mi 13 te chu Thenzawl-a COVID Care Centre-ah dah niin Serchhip-a Dedicated COVID Health Centre-ah midang pakhat, mipa chu dah a ni thung a ni. Hetianga hri kai enkawl tur rawn dah thar an nih avang hian sawrkar chuan anmahni enkawlna kawnga a tul anga thawk turin Doctor pathum (3) a rawn dah belh dawn nia thudawn a ni bawk.

Thenzawl atanga thu kan dawn danin Thenzawl AYUSH Hospital COVID Care Centre-a COVID-19 hri kai enkawl tura tih mi 13 te hi mipa puitling 10 leh hmeichhia pahnih (2) bakah naupang pakhat an ni a, zawhna chhangin Integrated AYUSH Hospital-a Resident Medical Officer, Dr. HT. Zothanmawia chuan, heng COVID-19 hri vei te hi hri an vei tih lanna Symptoms la awm lo an ni a. Hospital a dahluh an nih hian an hriselna enfiah vek an niin, an taksa a thain, an hriselna dinhmun pawh a tha tih a sawi a, heng an enkawl mekte hian natna lanchhuahna Symptoms an nei anih chuan Health Department hotuten tha an tih anga ZMC-ah emaw, Hospital dangah emaw enkawl tura lak leh tur an ni ang.

Thenzawl-a Integrated AYUSH Hospital hi COVID-19 hri vei enkawl theihna tur, COVID Care Center atana buatsaihna rei deuh tawh mahse, hri vei hi an la enkawl lova, tun hi hri kai an enkawlna hmasa ber tur niin AYUSH Hospital Staff te hi Team 4-ah inthenin, nizan atang khan Team pakhat, member 6 awmna ten an riahchilh nghal a. Hospital hi pawn lam mi bakah COVID-19 vei enkawl mektute bak Hospital Staff dang leh mipui tlawh phal loha khar nghal a ni a, mipuite tan chi-ai na leh hlauhthawn tur a awmloh thu thawktute chuan an sawi bawk.

Hetianga ZMC atanga hri kai enkawllai Serchhip District-a rawn dah belh an nih tak avang hian Serchhip District-a hri kai enkawllai chu mi 18 an tling ta a, SIRD-a Dedicated COVID Health Centre (DCHC)-ah mi 5 enkawl niin Thenzawl-a AYUSH Hospital-ah mi 13 enkawl an ni a. Heng bakah hian Serchhip District-ah mahni In lama inkhunghrang mi 107 leh Sawrkar hmunhmaa inkhunghrang mi 55 an awm mek bawk a ni.