Mizoram-ah hri kai mi 5 hmuh belh leh an ni

Niminpiah khan ZMC Laboratory-ah Swab Sample 248 enfiah niin heng atang hian hri kai 5 hmuh leh a ni a, Mizoram-ah hri kai 272 an tling ta a ni.
Sawrkar thuchhuah tarlan danin niminpiah-a ZMC Laboratory atanga hri kai hmuhchhuah te hi Mizo vek an ni a, mipa 4 leh hmeichhia 1 niin, kum 20 leh 39 inkar an ni a. Aizawl District ami 3 leh Serchhip District ami 2 an ni a. State pawn Karnataka, Uttar Pradesh, Bihar, Nagaland leh Tripura atanga lo haw te an ni a. An vai hian Quarantine Facility a awm niin, Symptoms nei an awm rihlo bawk. Niminpiah vek khan Lunglei Civil Hospital TrueNAT Laboratory-ah Swab Sample 23 enfiah a ni bawk a, heng te hi Repeat Sample (Sample test nawn) vek niin an zingah hian Positive Samples, tuna SIRD, Pukpui COVID Care Centre-a awm mek BSF 12 telin 9 chu hri lakah an fihlim tawh thung a ni.
Nimin thleng khan Mizoram-ah mi 17,760 te enfiahna atangin COVID-19 hri kai hmuhchhuah 272 an tling ta a, heng te Mipa 179 leh Hmeichhia 93 niin an zinga mi 160 te chu enkawl damin damdawi In atanga chhuahtir an ni tawh a, tunah hian mi 112 enkawl mek niin Aizawl District-ah enkawllai tam berin mi 70 enkawl mek an ni a, Lunglei District-ah mi 16, Lawngtlai District-ah mi 13, Siaha District-ah mi 6, Serchhip District-ah mi 4 leh Champhai, Kolasib leh Mamit District-ah mi pakhat theuh enkawl mek an ni a, Khawzawl, Hnahthial leh Saitual District-ah hri kai enkawllai an awmlo thung.

India-ah COVID-19 hri kai nuai 10 an tling ta
India rama COVID-19 hri kai hmuhchhuah chu nuai 10 an tling ta a, darkar 24 kalta chhung khan hri kai hmuhchhuah 34,956 an awm leh a ni. Ministry of Health & Family Welfare chhinchhiahna atanga a lan danin darkar 24 kalta chhung khan India ramah Sample 3,33,228 enfiah leh niin heng atang hian hri kai 34,956 zet hmuh leh a ni a, heng te nen hian India rama hri kai hmuhchhuah chu 10,03,832 zet an tling ta a, khawvel ram hrang hrang zingah hri kai hmuhchhuah tam lamah pathumna a ni mek a, India aia hri kai hmuh tamna hi USA leh Brazil chiah a awm tawh a ni.
India rama hri kai hmuhchhuah atang hian mi 6,35,756 te chu enkawl dam ni tawhin hei hi hri kai hmuhchhuah atangin zaa 63.33 an tling tawh thung a, tunah hian hri kai enkawllai 3,42,473 an awm mek a, hri kai enkawllai aiin enkawl dam hi 293,283 in an tam zawk a ni.
Darkar 24 kalta chhung khan India rama hri kai zingah nunna chan 687 awm lehin heng te nen hian nunna chan mi 25,602 an awm tawh bawk a, hei hi hri kai zawng zawng atanga chhutin zaa 2.55 an tling bawk. ICMR chhinchhiah danin India rama Sample enfiah tawh zawng zawng chu 1,30,72,718 an tling tawh a ni.

Comments

Chhiar Hlawhte