H&TE Minister in Private leh Kohhran College te zirlai lakbelh thei tura ngaihtuahna seng turin a ngen

Higher & Technical Education Minister Dr. R. Lalthangliana chuan nimin khan a Pisa-ah Mizoram chhunga Kohhran leh Private College hrang hrang Principal te kawmin College admission chungchang a sawipui a, zirlai lakbelh thei turin an ngaihtuahna lo seng turin a ngen bawk.

Minister in Kohhran leh Private College hrang hrang Principal te a kawmna hunah hian H&TE Minister chuan kum dangah College admission chungchangah zirlaiten seat indaihlohna avanga harsatna an tawh thin laiin kuminah phei chuan COVID-19 hripui leng vanga lo haw, zirlai tam tak phai an zirna chhunzawm remchang tawhlo an awm dawn tih sawiin, hei vang hian sawrkar pawh a lu a hai hle tih a sawi a. Zirlai admission changlo engemaw zat an awm thei dawn nia a lan thu sawiin, “Sawrkar College te pawh insangmar turin kan ngen viau chungin kan dinhmun hi a la khirh hle a ni,” a ti a. “Kan zavaia kan tanho a ngai a, zirlai lakbelh thei turin in ngaihtuahna lo seng ula, a theih ang anga tan lo la turin ka ngen che u,” tiin a chah bawk.
He hunah hian MYC Chairman, Dr. Vanlaltanpuia pawhin zirna quality tha zirlaiten an hmuh a pawimawh thu sawiin, College zirtirtu leh hmunhma pawh zirlaite rilru tiphur thei zawnga inbuatsaih a tul thu a sawi bawk.
He hunah hian Higher & Technical Education Department Director, K. Lalrinzuali pawhin Sawrkar College nilo tan pawh sawrkarin dan leh thil pawimawh dang zawm tura a duante tha taka zawm a pawimawh tih sawiin, a bik takin hripui leng karah thawhhona tha an neih chhunzawm zel a pawimawh takzet tih a sawi a. UGC Norms leh Guidelines te ngai pawimawh hram hram tura chahin, zirtirtu indaihlo lutuka inchhawr hian zirna quality a tichhe thei tih hre reng turin College Principal te a chah a, Private College te inrelbawl dan tur Establishment Rules pawh sawrkarin a buatsaih mek tih a sawi bawk.
Nimin-a inkawmna ah hian Mizoram sawrkar in permission a pek Private College 9 a Principal-te an tel kim thei a, Private College Principal-te pawhin an College dinhmunte sawiin an theihtawp chhuah an tum thu an sawi a ni.

Comments

Chhiar Hlawhte