Middle School Leaving Certificate (MSLC) Exam siam thar leh tum a ni - Education Minister

School Education Minister, Lalchhandama Ralte chuan Middle School Leaving Certificate (MSLC) Examination siam thar leh tum a ni tih a sawi.
He thu hi Inrinni-a Ratu Higher Secondary School Building sak thar a hawnna ah Education Minister hian a sawi a, Minister chuan kan ramah tun aia mumal zawka zirna a kal theih nan sawrkarin hma a la mek a, thil thenkhat thlakthlengte pawh a awm tih sawiin, “Kan zirna hi National Standard tling pha tura ruahmanna te pawh a awm,” tiin “Zirna kalphung siamthat nan hun reilote ah Middle School Leaving Certificate (MSLC) Examination siam thar leh tum a ni a, School endik pawh mumal zawka kalpui anih theih nan ruahmanna siam a ni,” a ti bawk.
School Education Minister chuan khawtlangah zirna in hmun sang a channa hmunah chuan zirna quality a tha thin tih pawh sawiin, kan ram zirna hmun leh Compound te chu khawtlang hruaitute leh nu leh paten vil ngunpui a, tuaihnum a pawimawh thu a sawi a, zirna chu sawrkar kut-ah ringawt dah chi a nih loh thu leh mipui nen tanrual a tul thu a sawi bawk a. Hmar tlangdung thim tieng turin zirna a pawimawh tih sawrkarin a hriat thu sawiin, “Science zirna te pawh dah belh a ni a, zirtirtu pawh thahnem tak dah belh a ni,” a ti a, heng sawrkar hmalakna te hi a hmang tangkaitu ni turin tlangdung mipuite chu a sawm bawk.
He hunah hian School Education Department-a Director, James Lalrinchhana chuan tun hripui leng mek avanga School hawn theih loh chhungin Class I - XII zirlaite awm awl mai lova an awm theih nan SCERT leh MBSE ten 'Week Wise Plan' an siam tih sawiin, hengte hi School hawn theih hunah assessment atan hman a nih dawn avangin nu leh pate pawh an fate lo ngaihvenpui turin a sawm bawk.
Ratu Higher Secondary School hi Lump sum Grant-in-aid dinhmuna awm mek niin School building thar hawn tak hi Office (18x24ft) leh Classroom (18x24ft) pahnih a ni a, zirlaite hman tur inthiarna pathum leh thawktute hman tur a awm bawk a. Building thar sak nan hian Rs. 28,05,869/- hman a nih bakah School kawt zawl pawh Cement-a zut mam anih bakah Waiting Shed sak a ni bawk. Ratu Higher Secondary School-ah hian kumhlui-ah khan zirlai 42 awmin Ratu khua bakah khaw thenawm Lungsum, New Vervek leh East Damdiai khua te an ni a, kumthar ah hian zirlai tam zawk neih beisei niin Inrinni-a he hun hmanna ah hian HSSLC result chhuaka zirlai hlawhtling te chawimawina hun hman nghal a ni bawk.

Comments

Chhiar Hlawhte