Puipunna-a meizu man tam

Sawrkar kum liamta, nikum April thla atanga kumin March thla tawp thleng khan Serchhip District Anti-Tobacco Squad te chuan puipunna hmuna mei zuk khapna dan bawhchhia mi 271 zet an man.

National Tobacco Control Prog-ramme (NTCP) hnuaiah Cigarettes and Other Tobacco Products Act (COTPA) Dan chu chak takin Serchhip District-ah kenkawh mek zel a ni a, sawrkar kum liamta, nikum April thla atanga kumin March thla tawp thleng khan Serchhip District Anti-Tobacco Squad te hian Squad Drive tum 60 neiin COTPA Section 4 bawhchhiaa Vantlang leh puipunna hmuna mei zu mi 271 an man a, hemi hun chhung hian Food & Drug Administration te nen tum thum Joint Operation neiin Dan bawhchhia Dawr 4 man an ni bawk a, Legal Metrology Enforcement Staff te nen tum thum Joint Operation neiin Dawr 2 man an ni bawk.

Sawrkar kum liamta chhung khan Vaihlo leh a kaihhnawih thatloh zia inzirtirna neiin School leh College tum 88 tlawh niin hemi hun chhung hian Kohhran leh tlawmngai pawl te nen tum 17 zet hun hman a ni bawk a, National Tobacco Control Programme (NTCP) buatsaihin Training leh Workshop tum 8 zet buatsaih niin heng ah hian mi 185 an tel bawk a ni.

Vaihlo leh a kaihhnawih ti thin ten an sim theihna tura ruahman, Tobacco Cessation Clinic (TCC) pawh sawrkar kum liamta chhung khan mi 365 ten panin heng te hi mipa 126 leh hmei-chhia 239 te an ni a, heng atang hian Vaihlo leh a kaihhnawih thil sim mi 56 awmin heng mite hi Mipa 20 leh hmeichhia 36 an ni a, TCC pantu zinga zaa 15.34 te chuan Vaihlo leh a kaihhnawih hi an sim ang a ni bawk.

Serchhip District-ah hian National Tobacco Control Programme (NTCP)-ah hian Dr. Lalhlunpuii chu District Nodal Officer niin District Consultant bakah Psychologist/Counselor, Social Worker leh Date Entry Operator pakhat theuh an awm a ni.