Mizoram Police Ui fing 'Canine Squad' lakluhna Home Minister hovin neih a ni

Mizoram Police Ui fing 'Canine Squad' member 8 te chu nimin khan Home Minister, Lalchamliana hovin lakluhna inkhawm G.S. Arya Mess, PHQ, Aizawl-ah neih a ni.

Canine Squad lakluhna inkhawmah hian Home Minister, Lalchamliana chuan Mizoram tan leh Mizoram Police tan ni chhinchhiahtlak a ni tih sawiin, kum 20 liamta ah khan Dog Squad kan lo nei tawh thin a, thang hnih lian zet a ral hnuah Canine Squad tha tak kan nei leh thei hi a lawmawmin Mizoram mipuite mi tithlamuangtu an nih ngei ka beisei a ni, a ti. Home Minister chuan Ui fing 8 an neih thar zinga 3 chu misual hnu chhui thiam an ni tih sawiin, Mizoram leh khawvelin an buaipui em em ruihhlo (drugs) hnim a chhui chhuak thei 3 leh puakthei thil (explosives/bomb) chhui thei pakhat an nei bawk tih a sawi a, mibo leh vanduai thil – In chim leh a dangte a awm-a mihring zawng chhuak thei (Search & Rescue) pakhat kan nei bawk tih sawiin, Mizoram tan an tangkai em em dawn a ni, a ti bawk.

Kum 2018-2019 khan Narcotic Control Bureau, Ministry of Home Affairs, Govt, of India chuan Mizoram chhunga dan lova ruihhlo tawlh rukna beihletna hmanraw pakhat atan Canine Squad dinna turin cheng nuai 18.40 chu Mizoram Police hnenah a sanction a. Hemi atan hian PHQ chuan Tender tichhuakin, uluk takin Ui note supply-tu tur hi thlangin, sipai leh Police hnena Ui tha chi supply kawnga hming tha uluk taka thlan niin, German Shepherd Dog (GSD) - 4 leh Labrador Retriever - 4 lei a ni a. GSD pakhat hi Rs. 50,000/- leh Labrador Retriever hi Rs. 40,000/- in lei a ni.

Ui enkawltu tur (Handler leh Asst. Handler) hetiang lama tui mi engemaw zat atangin Handler - 8 leh Asst. Handler - 8 thlanchhuah an ni a. Anni hian National Training Centre for Dogs, BSF Academy, Tekanpur, Gwalior, Madhya Pradesh-ah October ni 7, 2019 atang khan training an nei ve leh a, training hi tunah chuan an zofel tawh a ni. Heng Ui fingte hi Aizawl, Lunglei, Champhai leh Kolasib District-ah te dah an ni phawt ang.

Nimin-a Ui fing lakluhna inkhawm hi IGP (Hqrs.), John Neihlaia chuan a kaihruai a, Mizoram DGP, S.B.K. Singh IPS chuan inlawmna thu sawiin, lakluhna inkhawm neih zawh hian G.S. Arya Mess tualzawl-ah Ui fing ten an thiam thil an entir chhunzawm a ni.