Mizoram-ah COVID-19 hri kai 9 hmuh belh leh

Niminpiah khan Mizoram-ah COVID-19 hri kai hmuhchhuah thar 9 an awm leh a, heng mite nen hian Mizoram-a hri kai hmuhchhuah chu 326 an tling ta a ni.

Niminpiah khan ZMC Laboratory-ah Swab Sample 365 enfiah niin hri kai hmuhchhuah 8 an awm a, heng hri kai hmuhchhuah thar te hi mipa 6 leh hmeichhia 2, kum 26 leh 51 inkar bakah mipa naupang kum 10 mi te an ni. Heng hri kai hmuhchhuah te hi Aizawl District mi 7 leh Kolasib District mi pakhat niin Jammu & Kashmir, Assam, Bihar, West Bengal leh Nepal atanga Mizoram lo lut te an ni a. An vai hian Quarantine Facility-a awmlai an ni a, an zingah hian Zokhawsang-a Assam Rifles Sipai Quarantine lai pakhat a tel bawk a, an zinga 2 chu Mizo niin a bak mi 6 chu hnamdang niin Mizo positive zinga pakhat zawk hi India sipai, Jammu & Kashmir atanga lo haw a ni.

Niminpiah khan Champhai District-ah Rapid Antigen Test hmangin COVID-19 hri kai pakhat hmuchhuah a ni bawk a, amah hi mipa, kum 28 a upa, India sipai, Jammu & Kashmir atanga lo haw niin Quarantine Facility a awmlai a ni a, hri a kai tih finfiah a nih hnu hian DCHC-ah dahluh nghal a ni. ICMR Advisory angin Rapid Antigen Test positive hi COVID-19 positive (true positive) an ni a, finfiah tura ZMC RT-PCR Lab-a Sample thawn a ngai tawh lo a ni.

Mizoram-a hri kai zingah hian nimin khan Lunglei-a enkawl mi 5 te chu dam-a chhuahtir niin heti hian tun thlengin Mizoram-ah COVID-19 hri kai hmuhchhuah 326-ah mi 184 te chu enkawl dam ni tawh a, hei hi hri kai hmuhchhuah atangin zaa 56.44 niin mi 142 enkawl mek an ni.

India-a Hri kai hmuhchhuah tam ber ni thleng leh

India ram-ah nikhat thil thu-a COVID-19 hri kai hmuhchhuah tam ber ni thleng lehin darkar 24 kalta chhung khan hri kai 45,720 hmuhchhuah leh a ni a, India rama hri kai hmuhchhuah zawng zawng pawh nuai 12 an tling ta bawk. Health & Family Welfare Ministry thuchhuah tarlan danin darkar 24 kalta chhung khan India ramah sample 3,50,823 enfiah leh niin heng atang hian hri kai 45,720 hmuhchhuah leh niin heng te nen hian India rama COVID-19 hri kai hmuhchhuah chu 12,38,635 an tling ta a ni. India rama COVID-19 hri kai hmuhchhuah atang hian darkar 24 kalta chhung khan mi 29,557 te chu dam-ah puan niin mi 7,82,606 te chu enkawl dam an ni tawh a, hei hi hri kai hmuhchhuah atangin za zela 63.18 an ni a, tunah hian hri kai enkawllai 4,26,167 an awm mek bawk a, hri kai enkawl mek aiin enkawl dam hi 3,56,439 in an tam zawk a ni.

Darkar 24 kalta chhung khan hri kai zingah nunna chan mi 1,129 zet an awm leh bawk a, heng mite nen hian hri kai zinga nunna chan mi 29,861 an tling ta bawk a, hri kai zing za zela 2.41 te chuan nunna an chan tawh bawk a ni. ICMR chhinchhiah dan chuan India rama Sample enfiah zawng zawng hi 1,50,75,369 a tling tawh bawk a ni.