Latest News

Serchhip District-ah VC 54 awmin Vote nei 47,070 an awm dawn

Village Council inthlanpui neih tura hman tur Serchhip District chhunga Electoral Roll siam thar chu nimin khan tlangzarh a ni ta a, Serchhip District-ah Village Council 54 awmin VC seat 236 a awm dawn a, Vote nei thei mi 47,070 an awm dawn a, Vote ni thei zingah hmeichhia an tam zawk a ni.

Village Council inthlanpui neih tura hman tur Electoral Roll hi nimin chawhma dar 11:00 khan Serchhip District Election Officer, Kumar Abhishek IAS chuan Serchhip DC Meeting Hall-ah tlangzarhin District Election Officer chuan Electoral Roll ennawn hna thawk tur hian kumin March 13 khan Draft Electoral Roll chu tlangzarhin hming thun thar, paih ngai leh siamthat ngai te tan dilna hun hawn nghal a nih thu a sawi a. Hemi hnu hian hri leng avanga Electoral Roll siam hna hi thawh chhunzawm theih a nih tak loh hnuah July 15 atang khan heng dilna te hi enfiahin July 21, 2020 khan Electoral Roll enfiah hna hi zawhfel a nih thu leh tunah chuan Final Electoral Roll pawh tlangzarh theih a nih tak thu a sawi a. Electoral Roll siamthat hna thawktu zawng zawng bakah NGO leh Political Party te thawhpuina ah lawmthu a sawi bawk.
He Electoral Roll tlangzarh taka a lan danin Serchhip District chhungah Village Council 54 a awm dawn a, VC thar 4 piangin heng te hi Serchhip-II VC atangin Darnam VC leh Serchhip-VII VC atangin Serchhip Chanmari VC bakah Chhiahtlang VC chu VC pahnih-ah thenin Chhiahtlang North leh Chhiangtlang South VC a ni anga, a hmaa Chhiahtlang VC hnuaia Sub-Village ni thin, Vanchengte pawh Village Council thar a ni tawh dawn bawk a ni. Ruahman lawk ang chuan Serchhip District pum-a VC 54-a ah hian Seat 240 a awm dawn a, Seat 3 nei VC 23 awmin Seat 5 nei thei VC 24 an awm a, Seat 7 nei thei VC 6 leh Seat 9 nei thei VC pakhat an awm a, seat 3 leh Seat 5 nei VC-ah hian hmeichhia tan Seat khat zel hauh tur niin seat 7 awmna VC-ah hian hmeichhe tan Seat 2 hauh a ni thung anga, Seat 9 awmna ah hian hmeichhia te tan Seat 3 zel hauh a ni thung ang. Hetiang hian hmeichhia te tana Serchhip District pum-a Seat hauh tur chu seat 62 niin General Seat chu 178 a ni thung.
Tun tuma Electoral Roll tlangzarh tak atanga a lan danin heng VC 54-ah hian In 14,187 awmin Polling Booth 59 a awm dawn a, Vote nei thei mipa 22,944 leh hmeichhia 24,126 awmin Vote nei thei hi an vaiin 47,070 a ni dawn a, Electoral Roll siamthat chung hian mi 611 te thun thar niin mi 781 paih an ni thung a, Draft Roll aiin Vote nei thei hi mi 170 in an tlem zawk a, hei hi VC thlanna a Vote nei thei lo Non-Tribal te VC Electoral Roll atanga paih an nih vanga ngaih a ni.
Serchhip District chhunga VC hrang hrang zingah Thenzawl East VC chu Vote nei thei tam berna niin Vote nei thei 3178 an awm dawn a, Polling Station pawh 3 awm tura ruahman niin anni chiah hi Seat 9 nei thei VC an ni dawn a, Vote nei tlemna ber chu Vanchengte VC niin Vote nei thei 86 an awm a, anni chiah hi Voters 100 tlinlohna VC a ni bawk.
Nimin-a Electoral Roll thar tlangzarhna hunah hian Serchhip Election Officer, Vanlal-hmachhuana chuan tuna VC dinglai te term chu tum hnih pawhsei a nih tawh thu sawiin, tuna pawhsei ang chuan September 7, 2020 thleng VC term a nih thu a sawi a, Dan-ah chuan VC term zawh hmaa VC thlanna hi neih tur a nih thu sawiin, tunkar Zirtawpni khian Aizawl lama thuneitu sang zawkte nen Meeting neih a nih dawn thu leh hetah hian VC inthlan hun tur chungchang pawh sawiho a nih a rin thu a sawi bawk.
Nimin a Electoral Roll tlangzarhna hunah hian Serchhip District chhunga ERO leh AERO te bakah tlawmngai pawl hrang hrang aiawhte leh Political Party aiawhte an tel a, nimin a tel Political Party te hnenah hian Electoral Roll Copy hi semchhuah nghal a ni bawk.

Comments

Popular News (Last 30 Days)