Minister in Rural Haat leh Panchayat Bhavan hawng

Supply Minister, K. Lalrinliana chuan nimin khan Bairabi tlawhin Bairabi South-a Rural Haat leh Bairabi North Panchayat Bhavan te a hawn bakah Bairabi North Multipurpose Mini Sport Complex sakna tur lungphum phum nghal bawk.
Supply Minister in a hawn tak NABARD leh MGNREGS Convergence hnuaia sak, Bairabi South-a chawhmeh zawrhna hmun tur, 'Rural Haat' hi NABARD atanga sum hmuh cheng nuai 10, MGNREGS convergence atangin Rs. 1,34,300/- leh Village Council, Bairabi South sum Rs. 59,700/- senga sak a ni a, Minister chuan NABARD kaltlangin Mizoram-ah hmasawnna hrang hrang kalpui tum mek a nih thu sawiin, Warehouse 21 sakna tur a hmalak mek a nih thu leh Fisheries Department nen pawh thawhhona tha tak hnuaia ruahmanna siam mek a nih thu a sawi bawk.
Hemi hnu hian Supply Minister hian cheng nuai 20 senga Bairabi North Panchayat Bhavan sak thar chu hawngin, Sawrkar in mipui inrelbawlna tha a ngaih pawimawh thu leh hemi kawnga hmasawnna a awm theih nan ruahmanna tam tak siam a nih thu a sawi a. Village Council-te tih hmasawn nan State Finance Commission leh Excluded Area Fund hnuaiah hmalak dan tur ruangam tha tak tak kalpui tum a nih thu te a sawi bawk. Minister hian Multipurpose Mini Sport Complex sakna tur lungphum a phum nghal a ni. Supply Minister hian Bairabi North YMA Hall-a zirlai titha chawimawina hun pawh hmanpuiin HSLC pass thar mi 16 leh HSSLC pass thar mi 19 te hnenah lawmpuina thilpek a hlan nghal bawk.

Comments

Chhiar Hlawhte