Chanchin thar thenkhat :
Mizoram-ah Green Ag hawng
Agriculture Minister, C. Lalrinsanga chuan nimin khan SAMETI Conference Hall, Aizawl-ah ‘Green Ag: Mizoram State Inception Programme’ chu a hawng. Green Ag: Mizoram State Inception Programme hawnna Inkhawm ah hian Agriculture Minister chuan COVID-19 hripui leng karah Mizoram hmasawnna tura project pawimawh tak hawn theih a nih chu lawmawm a tih thu sawiin, Green Ag chu Project danglam bik, thiamna inhlanchhawnna project a nih thu a sawi a, he project hi Global Environment Facility funding niin United Nation peng pakhat, FAO in a thawk thung a, Mizoram-a Protected Area lian ber pahnih Dampa Tiger Reserve (Mamit District) leh Thorang Wildlife Sanctuary (Lunglei District) te a tuam dawn tih a sawi bawk.
Edn. Minister in tlawh
School Education Minister, Lalchhandama Ralte leh C. Lalmuanpuia MLA te chuan nimin khan Khuangleng, Leithum, Dungtlang, Sam-thang, Khuangthing leh Zawlsei khua te tlawhin tunhnaia lirnghingin vawi engemawzat a sawi avanga mipuite tuarna leh thil a tihchhiatte a hmunah an en a, Chief Minister-in he tlangdung vanduaina hi a ngaihpawimawh avangin a thei thei a hmunah kal tha a tih anga kal an nih thu sawiin, COVID-19 hripui leng avangin sawrkar hnathawk pawh an hlawh pe kim theilo dinhmun ah sawrkar chu ding mah sela, sawrkarin mipuite himna a ngai pawimawh a, a thawh theih ang ang te thawh a ni dawn a ni, a ti a. Heng khua ah hian Silpauline leh pawisa an hlan nghal bawk.
MSU in lawmthu an sawi
Mizo Students’ Union (MSU) General Hqrs. chuan Professional Course zirlai ten COVID-19 avanga Course Fee pek chungchanga harsatna an tawh avanga sawrkar a ngenna an thlen chu sawrkar-in a ngaihpawimawhsak tih sawiin, Total Lock down avanga Class an kal theih loh chhunga an fee pek tur chu 50% chauh an pek theih nana Circular a siam chu lawmawm an tih thu an sawi.
Rajya Sabha MP lo hmuak
Mizoram Rajya Sabha MP, K. Vanlalvena chu nimin khan New Delhi atanga rawn haw in MNF Party mi thahnem takin Lengpui Airport-ah an lo hmuak. Mizoram Rajya Sabha MP atana thlan, K. Vanlalvena hian tun thla ni 22 khan New Delhi-ah rinawmna thu tiamin Mizoram Rajya Sabha MP atan hian lakluh a ni a, hemi hnu hian sawrkar laipui-a mi pawimawh hrang hrangte a dawr hnuah nimin khan Mizo-ram-ah rawn haw in MNF hruaitu thahnem tak ten Airport-ah an lo hmuak a ni.
BJP Thalai ten mak an ti
BJP Mizoram Pradesh Thalaite chuan Education Minister, Lalchhandama Ralte chuan lirnghing tuar te a tlawhna-a thu a sawiah SEDP an sem theihloh chhanah COVID-19 hripui leng a puh nia sawiin, hei hi mak an tih thu leh Mizo mipuite hma-a hmaiphih nana hman chu zahthlak an tiin Mizo mipuite zahlohna ah an ngai tih nimin khan thuchhuah siamin an tarlang a. COVID-19 hrileng vanga Central Sawrkar in kawng engkimah mipuite harsatna awmlo turin State Sawrkar-ah sum an pe niin an sawi bawk.
Kawnpui-a School building sak thar hawng
Tuirial bialtu MLA, Andrew H. Thangliana chuan nimin khan Kawnpui-a Lalfak Memorial High School Building sak thar chu a hawng. School building sak thar hawnna hunah hian bialtu MLA chuan thiamna leh finna sang zawk eng pawh zir tur chuan High School tal paltlang a ngai tih sawiin, hei vang hian zirna bul tanna, Elementary leh Secondary Stage chu a pawimawh hle tih a sawi bawk.
Nimin-a hawn tak School Building thar hi bialtu MLA, Andrew H. Thangliana'n MLA Fund Rs. 2,50,000/- a pek leh Bank atanga Loan cheng nuai 2 an puk bakah mipui te nena thawhkhawm, a vaiin Rs. 6,50,000/- chuang senga sak a ni a, Class Room 2 leh Office te a awm a ni.
Assembly thutkhawm neih a ni dawn
Mizoram Legislative Assembly thutkhawm chu September 1, 2020 atang khian neih a ni dawn. Hemi chungchangah hian nimin khan Mizoram Governor, PS. Sreedharan Pillai chuan thuchhuah siamin Mizoram Legisaltive Assembly 8-na thutkhawm vawi 6-na chu September 1, 2020 chawhma dar 10:30 atanga neih a nih tur thu a tarlang a, Session neih hun chhung tur leh hun hman dan tur chu Speaker kaihhruai Business Advisory Committee in an la ngaihtuah leh dawn a ni.
BJP President in thuthar thehdarhtute kawm
BJP Mizoram Pradesh President, Vanlalhmuaka chuan nimin khan Mamit-ah thuthar thehdarhtute kawmin, “Inthlanpui lo awm leh turah chuan Congress party an awm tawh lo ang a, BJP leh MNF inbeihna a ni tawh ang,” a ti a, India rama kum sawmbi eng emawzat ata ngaia kan lo neih, thil fello chinfel chu sawrkar laipui thil tum a ni tih sawiin, BJP kaihhruai sawrkar hmalakna hrang hrangte a tarlang bawk.
Kawnpui-a School building sak thar hawng
Tuirial bialtu MLA, Andrew H. Thangliana chuan nimin khan Kawnpui-a Lalfak Memorial High School Building sak thar chu a hawng. School building sak thar hawnna hunah hian bialtu MLA chuan thiamna leh finna sang zawk eng pawh zir tur chuan High School tal paltlang a ngai tih sawiin, hei vang hian zirna bul tanna, Elementary leh Secondary Stage chu a pawimawh hle tih a sawi bawk.
Nimin-a hawn tak School Building thar hi bialtu MLA, Andrew H. Thangliana'n MLA Fund Rs. 2,50,000/- a pek leh Bank atanga Loan cheng nuai 2 an puk bakah mipui te nena thawhkhawm, a vaiin Rs. 6,50,000/- chuang senga sak a ni a, Class Room 2 leh Office te a awm a ni.
Assembly thutkhawm neih a ni dawn
Mizoram Legislative Assembly thutkhawm chu September 1, 2020 atang khian neih a ni dawn. Hemi chungchangah hian nimin khan Mizoram Governor, PS. Sreedharan Pillai chuan thuchhuah siamin Mizoram Legisaltive Assembly 8-na thutkhawm vawi 6-na chu September 1, 2020 chawhma dar 10:30 atanga neih a nih tur thu a tarlang a, Session neih hun chhung tur leh hun hman dan tur chu Speaker kaihhruai Business Advisory Committee in an la ngaihtuah leh dawn a ni.
BJP President in thuthar thehdarhtute kawm
BJP Mizoram Pradesh President, Vanlalhmuaka chuan nimin khan Mamit-ah thuthar thehdarhtute kawmin, “Inthlanpui lo awm leh turah chuan Congress party an awm tawh lo ang a, BJP leh MNF inbeihna a ni tawh ang,” a ti a, India rama kum sawmbi eng emawzat ata ngaia kan lo neih, thil fello chinfel chu sawrkar laipui thil tum a ni tih sawiin, BJP kaihhruai sawrkar hmalakna hrang hrangte a tarlang bawk.
Comments
Post a Comment