Result diklo-a mawhphurtu an phu anga hrem phut

MZP General Hqrs. chuan Inrinni khan Extended OB Emergency Meeting neiin HSSLC Exam result chhuaka tih dikloh awm-a mawhphurtute chu zawngchhuaka an phu anga hremna pek an phut thu an sawi.

MZP Extended OB Emergency Meeting neih hnua thuchhuah an siamah MZP General Hqrs. chuan kum 2019-2020 Higher Secondary School Leaving Certificate(HSSLC) result tihchhuah takah Lalhlimpuii D/o Vanlallura, St. Joseph Higher Secondary School Arts Stream a mi chu Subject dang zawng zawngah mark 90 a hmuh kai vek laiin, Answer paper endiktu te'n nasa taka tisualin Geography subject bikah mark 59 chiah mark pek a nih avangin Top ten-ah a lan loh phah niin an tarlang a. Complain anih hnuah mark sang tak hmuin Mizoram puma pakhatna hauhtu Christina Lalchhandami, Greenland Higher Secondary School, Aizawl ami nen mark hmuh zat inangin Topper nihna hial an hauh thei chu ropui an tiin an chhuang takzet tih an tarlang bawk.

MZP chuan HSSLC result-a tihsual a awm chu pawi an tih thu sawiin, Sawrkar thuneitu Education Department enkawltu leh MBSE Chairman te'n mawhphur ngama, Answer Paper check tu leh mark Enter-tute zawngchhuak a, Zirlai naupang hrilhhai leh rilru na taka siamtute chu zawng chhuaka an phu anga hremna pe ngei tura an phut thu an sawi a. He result diklo hi MZP chuan a enliam mai dawn lo tih pawh sawiin, thuneitute hmalakna chu an enzui reng dawn thu leh a tul anga hma an lak chhunzawm dawn thu an sawi bawk.