Buangpui tana tui pekna tur hna thawh mek tlawh

PHE Serchhip WATSAN Division in Jal Jeevan Mission hnuaia Buangpui khaw tana tui lak hna an thawh mek chu Inrinni khan PHE Serchhip Division-a SDO, Er. Samuel LR. Ralte chuan tlawhin hnathawh mek te a enfiah.

PHE Department hian Buangpui khaw tan hian Tuiri-hiau chu Solar Pump hmanga lain tun dinhmunah an khua hian tui an hnianghnar viau a, amah-erawh chu Sawrkar laipui in thingtlang khua zawng zawngte Tui Connection pek vek an nih theihna tura ruahmanna a siam, Jal Jeevan Mission hnuaia Serchhip WATSAN Division-a hmalakna hmasa atan hian Buangpui khua chu thlan niin he ruahmanna hnuaiah hian In tinah Tui Connection pek a ni dawn a, he hmalakna tlawhtu Er. Samuel LR. Ralte hi Thenzawl-a PHE Sectional Officer, Laltlangliana chuan tawiawmin Buangpui khawtlang hruaitu ten an lo dawngsawng a ni.

Er. Samuel LR. Ralte chuan Jal Jeevan Mission hnuaia Buangpui-a chhungkaw tinte Tui connection pekna turah hian hnathawhna zawng zawng atanga zaa 5-ah mipui ten tha an thawh ve tur a awm tih sawiin, Tui connection atana pawisa ngai cheng nuai 21.44 chu an hmu kim tawh a, ngawrh taka hna hi thawk tanin, Pipe pawh an dah tan tawh tih a sawi bawk.