Pelican Crossing System hman theih turin hawng

UD&PA Department changtu Deputy Chief Minister, Tawnluia chuan nimin khan Aizawl khawpui hmun 10-a Traffic Light hmanga kawng kanna, Pelican Crossing System bun fel chu Treasury Square-a Crossing System-ah hmet eng-in mipui hman theih turin a hlan.

Aizawl Smart City Ltd. hmalaknaa Pelican Crossing System bun thar hi Assembly Annexe, Conference Hall-ah a hawnna hun hman zui niin Deputy Chief Minister chuan Aizawl khawpui thang zelah Aizawl-ah pemkhawm an pun ang bawkin lirthei a pung nasa a, mumal zawka lirthei tlan dan leh ke-a kal mipui himna atan kawng hrang hrangin hma lak a nih thu a sawi a. Pelican Crossing System, Aizawl Smart City Ltd. hmalaknaa hawn chu Aizawl Traffic Management chanchin-ah mellung pawimawh tak anih bakah Aizawl khawpui thanna, Urbanization ngaihtuahin thil tangkai tak a nih ngei a beisei tih a sawi bawk.

Deputy Chief Minister chuan Aizawl Smart City Ltd. pianchhuah dan leh a tobul te tarlangin, Smart City in a tum ber chu mitin huap innghahna tlak khawpui siam a ni, a ti a. Smart City hnuaiah Project 78 hlawm-khawm niin Project 33 hi State Sawrkar hmalakna, State Matching Share atana telh a nih thu te, DPR 27 siam zawh a nih tawh thu leh Project 10 chu Tender tawh a ni tih a sawi a. Aizawl Smart City Project tih hlawhtlinna atan Central Sawrkarin cheng vbc. 128 a release tawh thu leh cheng Vbc. 68 phei chu tunhnai lawkah a rawn release thu te pawh a tarlang bawk.

Pelican Crossing System hi Aizawl khawpui chhunga mipuiten him zawka kawngpui an kan theih nana siam a ni a. Kawngpui lun leh mihring tamna lai zel hmun sawm (10)-ah dah a ni a. Traffic Police te’n an Control anga, mihring leh lirthei chetvel dan vawngtu tur a ni a, Pelican Crossing System hi bun hna hi M/S Innovations Delhi chuan thawkin Rs. 22,17,810/- in he hna hi an thawk a ni.

Pelican Crossing System-ah hian mipui leh motor khalhtute tan signal en tur a awm hrang a, mipui ke-a kal te tana Signal en tur Pelican Board-ah mihring lem a sen laiin motor khalh mek tu tana en ve tur Traffic Signal chu a hring ang a, motor a tlan mek tihna niin kawngpui ala kan theihloh tihna a ni a. Traffic Police in mipuite kawng kan tul a tih hunah Pelican Board ami chu a hmet ang a, Pelican Board ami mihring lem chu a lo hring in Traffic Signal chu a lo sen ve thung anga, mipui tan kawngpui kan theihin Motor tlan phal a ni lo thung ang.

He khawl hi Automatic (amah a inthlak) leh Manual (mihring in inthlak chawp tir)-a enkawl theih a ni a. Traffic Police lam duh dan in tunah chuan Manual-a enkawl tura siam (set) a ni a, duh hunah automatic a siam (set) mai theih a ni.