Serchhip-III VC ten chenna In 2 sak bul an tan

Serchhip-III Village Council chuan nimin khan an huamchhunga hmeithai pahnih te chenna In tur sak hna an thawk tan.

Serchhip-III Village Council te hian an huamchhung, Bazar Hnuai huamchhunga hmeithai pakhat chenna In chu a chhiat tawh avang leh tunhnaiah a kawmthlang leimin leh leikhi in an In ban kil chu a pawh awn tawh avanga luahzui zel tlak a nih tawh loh avangin sak that tumin nimin khan an In hi an thiah sak a, he In neitu hmeithai hi a fapa nen-a khawsa niin leikhi avanga In luahzui ngamloh hi thuneitute hnenah pawh thlen an tum thu Serchhip-III VC te chuan an sawi a, amaherawh chu tunah hian hmalak nghal a tul si avangin In hi an thiat ta tih an sawi a, In hi tuna an In awmna bulhnai, leimin hlauhawm loh china ngaih ah sak a ni dawn tih sawiin, nimin-a he In thiahna ah hian VC hnuaia hnathawk mek te chu hnatlang tura tiin anni bakah hian he In thiah tur lo hria mi tlawmngai thenkhat, an vaiin mi 50 vel thawkchhuakin In hi an thiat ta a ni.

Serchhip-III VC te chuan he In hi MG-NREGS atanga an sum khawl hmanga sak a ni dawn tih sawiin, he In hi a dung ft. 24 leh a vang ft. 15-a zau-a sak an tum thu sawiin, In hlui-a a chak hman theih ang ang chu an hman leh dawn thu an sawi a, In sak tur hi a ban bul-ah RCC hman an tum thu pawh sawiin, nimin khan a ban an phun fel nghal a ni.

Serchhip-III Village Council hian nimin vek khan an huamchhunga hmeithai dang pakhat chenna In tur sain ban bul an phun bawk a, he chhungkua hi tun thla ni 12 khan an pa ber chuan Cancer vanga boralsanin a nupui fanau te hian chenna In tur an neih loh avangin a pasal te kawm-thlang ram awl ah In hi an sak sak dawn a, nimin vek khan ban phun nghalin In hi a dung ft. 24 leh a vang ft. 15-a zau-a sak a ni anga, a ban-ah RCC hmangin a bak chu Assam Type-a chhun-zawm a ni ang.