Mobile Food Testing Laboratory (Food Safety on Wheels) hman theih turin tlangzarh a ni

/
Health Minister, Dr. R. Lalthangliana chuan Mobile Food Testing Laboratory (Food Safety on Wheels) chu nimin khan Aizawl-a MINECO kawtzawl-a Programme buatsaihah mipui hman theih turin a tlangzarh a. Hmun hrang hranga kal kual thei ei leh in tur enfiahna chu tangkai taka hman a nih a beisei thu a sawi bawk.

Mobile Food Testing Laboratory (Food Safety on Wheels) tlangzarhna hunah hian Health Minister chuan mipui tana ei leh in him leh tha hralhchhuah leh pekchhuah a nih theih nan Food Testing chu thil pawimawh em em a ni tih sawiin, hmun kilkhawr zawk pawh thleng thei, kawng dunga thingpui dawr leh Hotel-a eitur siamte a him tawk em tih enfiah zung zung theihna tur Mobile Food Testing Laboratory hman theih a ni ta chu lawmawm a tih thu a sawi a. Ei leh in-a fimkhur a tulzia sawiin, kan ei turte a thianghlimin a hrisel tawk em tih uluk taka enfiah tura hmun hrang hranga kalkual thei Mizoram Sawrkarin a nei ta chu tangkai taka hman a nih a beisei thu a sawi bawk.
Central Sawrkar chuan ei leh in thianghlim leh tha a ngaih pawimawh avangin kum 2016-17 khan ‘Strengthening of Food Testing System’ a kalpui tan a. Chu mi kal zelah chuan Central hnuaia Food Testing Laboratory awmsate thuamthat a nih bakah engemaw zat din thar a ni bawk a. State Sawrkar-te pawh Food Testing lamah nasa zawka tan la turin a hriattir a. He hmalakna in a ken tel pawimawh tak chu Mobile Food Testing Laboratory (MFTL) hi a ni.
Mobile Food Testing Laboratory (MF-TL) hi ‘Food Safety On Wheels’ tia sawi a ni bawk a, he Scheme hnuaiah hian FSSAI chuan India ram puma hman turin MFTL 62 a ruahman a. Mizoram pawh pahnih (2) pek tur zingah telin tuna tlangzarh tak bakah pakhat dawn belh leh thuai beisei a ni.
Mobile Food Testing Laboratory hi khawl (basic infrastructure) famkim thei ang bera thuam a ni a. Food products chikim test theih ni lo mah se, nitina ei leh in mamawh zualpui test theih tura ruahman a ni bawk a. Technical Officer, Analyst, Attendant leh Driver ten an enkawl dawn a ni.

Comments

Post a Comment

Popular News (Last 30 Days)

A hun pangngai ah Pavalai Intawhkhawmna neih tum a ni

/
Image
April 12-14, 2024 chhunga Mizoram pum huap Kohhran Pavalai Pawl Intawhkhawmna neihna tur East Lungdar tlang-a Pandal sak chu tukin zing-a thli tleh khan a tichhe vek a. Vawiin vek-a Organising Committee thutkhawm hmanhmawh neih chuan a hun pangngai a neih tumin Pathian chakna ringin inbuatsaihna kalpui nise an ti a. Naktuk (April 1, 2024) atangin Pandal chhia senghawi hna leh Pandal sak that hna chu a khawnat-a thawh nghal tum a nih thu East Lungdar Village Council President K. Lalngaizuala chuan LENKAWL a hrilh.
Kimchang zawkin »

LPG man bithliah thar a ni

/
Image
IOCL in Revised Retail Selling Price a tihchhuah angin Mizoram chhunga eirawngbawlna gas man chu bithliah thar leh a ni a, Vairengte tih loh Mizoram hmundang zawngah chuan LPG Domestic Cylinder kg. 14.2 a rit man chu bur khat Rs. 955/- niin kg. 19-a rit Commercial Cylinder chu Rs. 2224.50 leh kg. 19-a rit XtraTeJ chu Rs. 2247/- a ni anga, kg. 10 a rit Composit Cylinder chu Rs. 688.50 a ni bawk ang. Gas man hi Home Delivery kalpuina ah chuan bur khat ah Rs. 70/- aia tam lo belh tur a ni anga, Home Delivery kalpui thei nganglo Veng, Point delivery kalpuinaah chuan Rs. 7.53 zel belh tur a ni a. Godown-a hralh erawh chuan Rs.33.43 zel paih thung tur a ni.
Kimchang zawkin »