Mizoram-a ranvulh zingah Ar ala tam ber

AH & Vety Department chuan Mizoram-ah ranvulh chhiarpui neiin tunhnai khan an chhiarpui neih hi puanchhuah a ni a, Mizoram ranvulh zingah Ar a tam ber.
AH Vety Department hian nikum (2019) khan chhiarpui hi an nei a, an Data hi sawrkar laipui-ah thawnin tunhnai khan sawrkar laipui chuan mipui hmuh theihin a tlangzarh a. He chhiarpui atanga a lan danin Mizoram-ah ranvulh chi 11 awmin heng te hi Bawng, Lawi, Sial, Beram, Kel, Vawk, Sakawr, Sabengtung, Ui, Sazupui leh Ar/Sava lam chi (Ar, Varak, Turkey, Sava) te an ni a, Mizoram-a ranvulh chhinchhiah hi 24,77,724 a ni. Ranvulh zingah hian a mal khaiah Ar chu tam berin 2,034,899 a awm a, hei hi ranvulh zawng zawng atanga chhutin 5% a tling a. Ar dawtah hian Vawk chu tam berin 2,92,465 a awm a, Ui 69,860 leh Bawng 45,701 ten an dawt a ni.
Ran chhiarpui hi kum 2012 khan neih a lo ni tawh a, chuta tanga a lan danin ran awm zat hi pung mah se Lawi, Beram, Kel, Sakawr tê chi, Sazupui leh Turkey-ah te chuan chhiarpui neih hmasak a phak lo a ni. AH & Vety Department chuan ran chhiarpui chu thil tih harsa tak niin an sawi a. Nitin ran chu piang leh thi an awm zel avangin chhiarpui neih laia an chhiar dan chu an report-ah hian an tarlang nia sawiin, hei hi a tuk lawkah a danglam nghal thei zel tih an sawi bawk.

Comments

Chhiar Hlawhte