Chanchin thar thenkhat :

Kuhva man-ah sum hmu tam

Hachhek Bial Kuhva Chingtu Pawl (HB-KCP) chuan kumin chhung hian Kuhva hralhna atanga an sum hmuh chu cheng nuai 1464.5 a tling niin an sawi. Hachhek Bial Kuhva Chingtu Pawl (HBKCP) hian an huamchhunga khaw hrang hrang ten kumin chhunga Kuhva man atanga sum an lakluh dan hi lakhawmin Kuhva man atangin cheng nuai 1464.5 an hmu tawh a, sum lalut hnem ber Kawrthah chuan cheng nuai 446.7 an lalut tawh a, Zamuang in cheng nuai 370 la tawhin Rengdil in cheng nuai 353.8, Hriphaw in cheng nuai 185, Kawrtethawveng in cheng nuai 80, Saikhawthlir in cheng nuai 30, Bungthuam in cheng nuai 6.5 leh Thinghlun in nuai 2.5 an lalut bawk.

DC in Oil Palm khawl tlawh

Kolasib District Bawrhsap, Dr. H. Lalthlang-liana chuan nimin khan Godrej Agrovet Ltd. Palm Oil Mill, Bukvannei chu tlawhin helai hmuna hna an thawh dan leh Oil Palm chingtute harsatna tawh chu thawktute nen an sawiho a, Kolasib DC chuan Godrej Agrovet Ltd. Palm Oil Mill, loneitute tan a chhawr tangkai theiha a awm chu lawmawm a tih thu a sawi. Godrej Agrovet Ltd. Palm Oil Mill, Bukvannei hi Oct. 28, 2014-a hawn niin Godrej Company hian kum 2010 atangin Mizoram-ah Oil Palm rah hi a lei khawm tan a, Kolasib District chhungah kum 2018, April atanga 2020, June thleng khan Rs. 2,24,45,930.5 man a lei tawh a ni. Kolasib District-ah hian khaw 30-ah Oil Palm chin niin kumin hian April atanga June khan cheng nuai 30 man hu hralh a ni tawh bawk.

MP (RS) in BSF hotu kawm

Mizoram Rajya Sabha MP thar, K. Van-lalvena chuan nimin khan New Delhi-a BSF Hqrs. ah BSF DG, SS. Deswal IPS chu kawmin Mi-zoram-a BSF Sipai zinga COVID-19 case sang ta lutuk chungchang a sawipui a, BSF DG chuan Addl. DG Kolkata be nghalin BSF Campus chhungah Quarantine Centre leh Hospital siam leh zauh tura a tih bakah Battalion Movement an khap hrih tawh tih a lo hrilh a ni.

Sawrkar ruahman tha ti lo

Mizoram Pradesh Congress Committee (MP-CC) chuan Mizoram-a rawn haw te inkhunghranna leh ei leh in man bakah an Sample Test-na man chawitir tura sawrkar ruahmanna chu tha an tihloh thu nimin khan thuchhuah siamin an tarlang a. Hun kal tawhah Community Quarantine Centre leh Kohhran Hall-a Quarantine tam takte chu Kohhran leh khawtlang tangrual bakah mi inpe engemaw zat in an ei leh in man an tumsak hnem hle tih tar-langin, CM Relief Fund-a COVID-19 dona atana mipui thawhkhawm cheng vbc. 7 chuang la awm pawh hmang mai turin sawrkar chu an ngen bawk.

Aizawl DTO ti danglam leh

Mizoram sawrkar chuan Aizawl-a District Transport Office (DTO) chu a siam danglam a, DTO Aizawl (Urban) chu DTO (Registering Authority) tiin Aizawl District chhunga Motor registration leh a kaihhnawih thil reng reng chu he Office hian a khawih tawh anga. DTO Aizawl (Rural) chu DTO (Licensing Authority) tih a ni tawh ang a. Learner Licence te, Driving Licence, Conductor Licence te leh a kaihhnawih thil reng reng an khawih thung ang. Heng District Transport Office pahnih te hian code thuhmun, MZ-01 an hmang ang.

MSU in zirlai chawimawi

Mizo Students’ Union (MSU) General Hqrs. chuan kumin-a HSSLC (pawl 12) Exam result chhuaka Stream hrang hranga Mizo zirlai Top-3 te lawmpuina leh MSU Award hlanna nizan hmasa khan Ignite Studio, Aizawl-ah an buat-saih a, he hunah hian zirlai titha 9 te hnenah chawi-mawina hlanin Dr. Sangthankima, Founder, Thutak Nunpuitu Team (TNT) hnenah 'MSU Award' hi an hlan bawk a ni.

BADP sum hman dan tur sawihona neih a ni

Champhai District Level Border Area Development Programme (BADP) Screening Committee chu niminpiah tlai khan thukhawmin BADP Annual Action Plan 2020-2021 chungchang sawiho a ni a, he sum ruahman hnuaia hnathawh tur hrang hrang thlirho a ni. Kum 2020-2021 chhunga BADP sum allocation chu Champhai RD Block tan cheng nuai 293 leh Khawbung RD Block tan cheng nuai 247 te a ni a, BADP sum dawn tur atanga 10%, Assam Rifles/BSF te hnathawhna tura ruat cheng nuai 45 hman dan tur pawh enho a ni bawk.