chanchin thar thenkhat :

Larsap in pass lawm sak

Mizoram Governor, PS. Sreedharan Pillai chuan chhungkaw harsatna kara hlawhtling taka Higher Secondary School Leaving Certificate (HSSLC) Exam result chhuaktaa Mizoram pum a 8-na hauh thei, Vanlalvenhimi, Durtlang North lawmpuina hun nimin khan Raj Bhavan-ah a buat-saih a. Larsap chuan Vanlalvenhimi hian lehkha zir turin a mawhphurhna dang, a nu leh pa te hnathawka chhuah hlana inchhung khawsak enkawl hna leh a naute enkawl hna a thawk tel thin tih sawiin, a mawhphurhnate zawng zawng pawh lehkhazir loh phah nana hmang lova hlawhtlinna ropui tak a thawkchhuak chu India ram puma zirlaite tan entawn tlak a tlin thu leh a chhuan-awm takzet thu a sawi. Vanlalvenhimi, Govt. Durtlang HSS atanga zirchhuak ta hian zantin dar 6:00 atanga dar 10:00 leh zingtin dar 3:00 atanga dar 7:00 thleng lehkha a zir thin a. College a zirtirtu hna thawh tumin a thlawna Admission petu Govt. Hrangbana College-ah a zirna chhunzawm dawn a ni.

Sa leh thlai man sawiho

Commerce & Industries Minister Dr. R. Lalthangliana hovin nimin khan Aizawl-a Commerce & Industries Department Conference Hall-ah Mizoram chhunga thei, thlai leh sa rate mumal taka ruahman a nih theih nan Commerce & Industries Department hotute nen a vawi thumna atan thutkhawm neih a ni a. Hemi hmalam hian Study Team chu Commerce & Industries Department Director kaihhruaina hnuaiah din ni tawhin nimin thutkhawm ah hian Study Team Report ngaihthlak a ni a,, survey uluk taka neih zel nise, a hma thei ang berin thei, thlai leh sa rate mumal tak ruahmanna (price regulation) neih nise an ti a ni.

College-a Shift siam belh duh

ZPM Thalaite chuan tunhnaia pawl 12 exam result a chhuah hnuah COVID-19 avangin phai-lam a lehkhazir tura Mizoram chhuahsan chu a ngamawm hrih loh avangin mi tam takin Mizo-ram-a zir chhunzawm an duh ngei a rinawm tih thuchhuah siamin an tarlang a. Kumdang-ah pawh Admission hnawng an tam thin avangin Mizoram sawrkar chu kumin-a pawl 12 pass chhuak ho pual bik hian College tinah Morning Shift emaw, Evening Shift emaw buatsaih sak turin an ngen tih an tarlang bawk.

Mamit bialtu MLA in hawng

Mamit bialtu MLA leh Road and Infrastructure Development Board Vice Chairman, Er. H. Lalzirliana chuan nimin khan Dampa-rengpui-ah Mizoram Bru Art & Culture Orga-nisation Branch Office sak thar chu a hawng a. Bru unaute tana Art & Culture Office hawn a ni ta chu lawmawm a tih thu sawiin, Handloom changtlung tak dinna tura a hmunhma tur enfel a ni chu a lawmawm a tih thu a sawi bawk. He hunah hian MBACOS Raising Day chu sawm bikte nen an hmanpui nghal bawk.

MP (RS) in lawmthu sawi

Vawiin-a Mizoram Rajya Sabha MP term hmang zo tur, Ronald Sapa Tlau chuan nimin khan Aizawl Press Club tlawhin MP a nih ve chhunga Mizo mipui duhsakna leh thlawpna ah lawmthu a sawi a, Mizoram Rajya Sabha MP thar tur, K. Vanlalvena duhsakna a hlan bawk. Hetihlai hian State 20 atanga Rajya Sabha Member atana thlan thar mi 61 te chu karleh Nilaini, July 22 khian Rajya Sabha rorelna hmunah Member atan Chairman in a lalut dawn a, hri leng laka himna turin midang hlat-a awm ngaih pawimawh a ni ang.

Mipuite fimkhur turin chah

Mizoram Police chuan thuchhuah siamin tunlai hian Mizoram-ah Company thenkhat, product nei lo leh product zuar ni lo, hlawkna an hmuh theihna tura Scheme holam te te siama Joining/Scheme Subscription fee etc. atan mipui pawisa deposit-tira sum vei virtir vel (money circulation scheme) an lo chhuak mek tih hriat a ni tih an tarlang a. Heng ang zirchianna ah hian dan lova thil ti engemaw zat hmuhchhuah an nih thu tarlangin, hetiang inbumna lakah hian fimkhur turin mipuite chu an chah bawk.

Mi 13,728 te rawn haw tawh

S COVID-19 Task Group on Migrant Workers & Stranded Travellers chhinchhiahna atanga a lan danin nimin thleng khan Mizoram mi leh sa State pawn-a tangkhang mi 13,728 te chuan Mizoram an rawn thleng tawh a, rawn la haw tur chhinchhiah 678 la awmin mi 12,734 chuan inkhunghranna hmun an chhuahsan tawh bawk.