Mizoram-ah COVID-19 hri kai 13 hmuh belh a ni

Niminpiah-a ZMC Laboratory-a Swab Sample enfiahte atangin COVID-19 hri kai mi 13 hmuh belh leh an ni a, tun thlengin Mizoram-ah hri kai mi 297 hmuhchhuah an ni tawh.

Sawrkar thuchhuah in a tarlan danin niminpiah khan ZMC Laboratory-ah Swab Sample 133 enfiah niin heng te hi Aizawl leh Hnahthial District bakah ZMC-a damlo enkawllai te niin heng atang hian hri kai mi 13 hmuhchhuah an ni a, hri kai hmuhchhuah thar te hi mipa vek niin kum 23-49 inkar, Aizawl District ami vek an ni.

Hri kai hmuhchhuah zinga 11 hi RAY Building, Falkland-a BSF Sipai quarantine mekte an ni a, COVID-19 symptoms nei an awm lova, a dang pahnih hi ZMC-a awm ve ve niin pakhat hi Indian Army, Jammu & Kashmir atanga lo haw, Symptoms nei a ni a, a dang pakhat leh hi ZMC-a hri kai atanga kaichhawng nia hriat a ni thung.

Niminpiah vek khan Lunglei Civil Hospital Truenat PCR-ah sample 17 enfiah a ni bawk a. Sample enfiah te hi hri kai tawh enkawllai te vek niin BSF Sipai hri kai enkawllai mi 4 zinga 3 te chuan hri an kai tawhlo tih nemngheh a ni a, Positive te atanga hri kai hmuhchhuah mi 11 te zinga mi 2 te pawhin hri an kai tawhlo tih hmuhchhuah a ni bawk.

Mizoram-a hri kai enkawllai zingah nimin khan damdawi In chhuahsan an awmlo thung a, heti hian nimin thleng khan Mizoram-ah hri kai hmuhchhuah zawng zawng chu 297 an tling ta a, heng te hi mipa 202 leh hmeichhia 95 niin hri kai zinga mi 168 te chu enkawl dam ni tawhin hei hi hri kai hmuhchhuah atangin zaa 56.56 an ni a, tunah hian hri kai enkawllai 129 an awm mek bawk a ni.

India-ah COVID-19  hri kai hmuh belh zel an la ni :

India ramah COVID-19 hri kai hmuhchhuah mi nuai 11 chuang tawhin hri kai zinga enkawl dam pawh mi nuai 7 an chuang tawh bawk. Ministry of Health & Family Welfare chhinchhiahna atanga a lan danin darkar 24 kalta chhung khan India ramah Sample 3,33,395 enfiah leh niin heng atang hian hri kai hmuhchhuah thar 37,148 an awm leh a, heng te nen hian India rama hri kai hmuhchhuah tawh hi 11,55,191 an tling ta a ni.

India rama hri kai hmuhchhuah an pun zel lai hian enkawl dam pawh pung ve zelin darkar 24 kalta chhung khan mi 24,491 te chu dam ah puan niin heng te nen hian hri kai zinga mi 7,24,577 te chu dam-ah puan an ni tawh a, hei hi hri kai hmuhchhuah atanga chhutin zaa 62.72 an tling tawh a, tunah hian hri kai enkawllai 4,02,529 awmin hri kai mek aiin enkawl dam hi 3,22,048 in an tam zawk a ni. India rama hri kai hmuhchhuah zingah hian nunna chan mi 28,084 awm tawhin hei hi hri kai hmuhchhuah atangin zaa 2.43 a ni bawk. ICMR chhinchhiah danin tun thlengin India ramah hian Sample 1,43,81,303 enfiah a ni tawh a ni.