Dan lova Sikret lakluh cheng nuai 5 chuang hu Serchhip-ah tihchhiat a ni

Serchhip District Anti-Tobacco Squad leh Legal Metrology Enforcement Staff ten Dan phalloha rampawn atanga Sikret lakluh an man te chu nimin khan tihchhiat niin heng Sikret tihchhiat te hi a vaiin cheng nuai 5 chuang hu nia chhut a ni.

Heng Sikret tihchhiatna puala hun tawi, Serchhip Medical Complex-a neih ah Serchhip District Medical Superintendent, Dr. ZD. Lalmuanawma chuan National Tobacco Control Programme (NTCP) hnuaia Serchhip District Anti-Tobacco Squad leh Legal Metrology-a thawktute thahnem ngaihna avanga hetianga Dan phalloh a Sikret lakluh man a ni leh tihchhiat a ni chu lawmawm a tih thu sawiin, heng Sikret te hi taksa hriselna atana thalo leh Cancer natna pawh thlen thei a ni tih sawiin, Dan phalloh a nih hre chunga rawn lalut duh an awm reng chu vanduaithlak a tih thu a sawi a. Tunhnaiah phei chuan Dawr-a zawrh bakah Internet hmanga Online-a zuar te pawh an awm nia sawi a ni tih sawiin, heng mite pawh hian mipuite hriselna atan an thil tih thin hi sim se a duh thu a sawi bawk.

Heng Sikret tihchhiatna puala inkhawm tawi neih hi K. Hmingthansangi, District Consultant, NTCP chuan a kaihruai a, he huna tarlan a nih danin heng Sikret an tihchhiat te hi rampawn, a bik takin Myanmar atanga Dan phalloh-a lakluh an man te niin August 2017 leh July, 2019 inkar chhunga an man te a ni a, Sikret an man an tihchhiat te hi tum 6-a an awm te niin nimin-a an tihchhiat zawng zawng hi a vaiin Pocket 13,731 a ni a, Farstar, Winbody, V-Sikret leh Win te niin pakhat Rs. 40/- hisap-a chhutin a vai hian Rs. 5,49,240/- man vel a ni a, tunlai-a tualchhung hralhna anga chhut phei chuan hei ai hian a hlutna hi sang zawk fe tura ngaih a ni.

Nimin a heng Sikret tihchhiat te hi halral a remchan loh avangin a bawm tanbun vek a nih hnuah tui-a leih a ni a, he hun hmanna ah hian National Tobacco Control Programme (NTCP) hnuaia thawktute leh Legal Metrology Inspector, Johny Zonunmawia leh a thawhpuite bakah thuthar thehdarhtute an tel a ni.

Serchhip-a Legal Metrology Inspector, Johny Zonunmawia chuan Serchhip District-ah chuan hetianga Dan phalloh-a Sikret lakluh zuar hi hmuh tur an awm tawhlo nia an hriat thu kan palai zawhna chhanga sawiin, a bikin Serchhip khawpui chhungah phei chuan zawrhchhuah a awm ngai tawhlo tih a sawi a. Hetianga rampawn atanga Sikret lakluh te hian Dan anga Chhiah an chawi loh avang leh Sikret bawm-a inziak tura Dan in a phut te ziahlan a nih loh avangin Dan hmanga man theih a nih thu a sawi bawk.