Mizoram-ah hri kai 29 hmuh belh a ni

/
Niminpiah-a Mizoram-a Swab Sample enfiahte atangin COVID-19 hri kai hmuhchhuah 29 zet an awm leh a, Mizoram-a hri kai hmuhchhuah zawng zawng chu 267 an tling tawh.
Sawrkar thuchhuah tarlan danin niminpiah khan ZMC Laboratory-ah Sample 295 enfiah niin heng atang hian COVID-19 hri kai hmuhchhuah 24 awmin midang 271 te chu hri lakah an fihlim tih finfiah a ni. ZMC Laboratory-a COVID-19 hri kai hmuhchhuah thar te hi mipa 21 leh hmeichhia 3 niin, kum 3 leh 64 inkar an ni a. Hri kai hmuhchhuah thar zinga 13 hi Assam Rifles Sipai, Zokhawsang Assam Rifles Quarantine Facility-a awm mekte an ni a, NDRF kum 27 mi, Symptom neih avanga ZMC-a enkawllai pawh hri kai hmuhchhuah thar zingah hian a tel bawk.
Hri kai hmuhchhuah midang 9 chu Lawngtlai District mi leh sa niin mipa 7 leh hmeichhia 2 an ni a, Assam leh Bihar atanga lo haw te niin hri kai hmuhchhuah dang pakhat hi hmeichhe naupang kum 3 mi, Arunachal Pradesh atanga Mamit District-a rawn haw a ni thung.
Niminpiah vek khan Lunglei TrueNAT Laboratory-ah Sample 26 enfiah niin heng atang hian COVID-19 hri kai mi 5 hmuhchhuah leh an ni bawk a, heng mite hi BSF sipai, Vanhne Camp-a awm te niin kum 30 leh 58 inkar, Symptom neilo leh hri kai hmuhchhuah tawh te nena lo khawsak ho avanga hri kaichhawng te vek an ni. Heti hian nimin thleng khan Mizoram-ah COVID-19 hri kai hmuhchhuah hi mi 267 an tling ta a, tunah hian mi 160 te chu enkawl dam ni tawhin hri kai enkawllai 107 an awm mek bawk. 

Nikhat-ah hri kai sing thum chuang hmuchhuak
Darkar 24 kalta chhung khan India ramah COVID-19 hri kai hmuhchhuah thar 32,695 awm lehin hei hi nikhat-a hri kai hmuhchhuah tam ber ni leh nikhat-a hri kai sing thum chuang hmuhchhuah an awm hmasak ber a ni. Ministry of Health & Family Welfare chhinchhiahna atanga a lan danin darkar 24 kalta chhung khan India ramah sample 3,26,826 enfiah leh niin heng atang hian hri kai hmuhchhuah thar 32,695 awmin hei hi nikhat-a hri kai hmuhchhuah tam ber tum a ni a, heng mite nen hian tun thlenga hri kai hmuhchhuah hi mi 9,68,876 an tling tawh a ni.
India rama hri kai zingah hian mi 6,12,814 te chu enkawl dam ni tawhin hei hi za zela 63.24 niin hri kai enkawl mek 3,31,146 an awm thung a, hri kai enkawl mek aiin enkawl dam hi 2,81,668 in an tam zawk a ni. Hetihlai hian darkar 24 kalta chhung khan nunna chan mi 606 zet an awm thung a, heng te nen hian hri kai zingah nunna chan mi 24,915 an awm tawh bawk a, hei hi hri kai hmuhchhuah zawng zawng atangin zaa 2.57 an tling a ni.

Comments

Post a Comment

Popular News (Last 30 Days)

A hun pangngai ah Pavalai Intawhkhawmna neih tum a ni

/
Image
April 12-14, 2024 chhunga Mizoram pum huap Kohhran Pavalai Pawl Intawhkhawmna neihna tur East Lungdar tlang-a Pandal sak chu tukin zing-a thli tleh khan a tichhe vek a. Vawiin vek-a Organising Committee thutkhawm hmanhmawh neih chuan a hun pangngai a neih tumin Pathian chakna ringin inbuatsaihna kalpui nise an ti a. Naktuk (April 1, 2024) atangin Pandal chhia senghawi hna leh Pandal sak that hna chu a khawnat-a thawh nghal tum a nih thu East Lungdar Village Council President K. Lalngaizuala chuan LENKAWL a hrilh.
Kimchang zawkin »

LPG man bithliah thar a ni

/
Image
IOCL in Revised Retail Selling Price a tihchhuah angin Mizoram chhunga eirawngbawlna gas man chu bithliah thar leh a ni a, Vairengte tih loh Mizoram hmundang zawngah chuan LPG Domestic Cylinder kg. 14.2 a rit man chu bur khat Rs. 955/- niin kg. 19-a rit Commercial Cylinder chu Rs. 2224.50 leh kg. 19-a rit XtraTeJ chu Rs. 2247/- a ni anga, kg. 10 a rit Composit Cylinder chu Rs. 688.50 a ni bawk ang. Gas man hi Home Delivery kalpuina ah chuan bur khat ah Rs. 70/- aia tam lo belh tur a ni anga, Home Delivery kalpui thei nganglo Veng, Point delivery kalpuinaah chuan Rs. 7.53 zel belh tur a ni a. Godown-a hralh erawh chuan Rs.33.43 zel paih thung tur a ni.
Kimchang zawkin »