Chief Minister in ZIDCO Office a tlawh

Chief Minister Zoramthanga chuan nimin khan Aizawl-a Zoram Infrastructure and Industrial Development Corporation Ltd. (ZIDCO) Office tlawhin ZIDCO-a thawktute chu Mizoram hmasawnna atana mawhphurhna lian tak an neih thu a sawi a, thahnemngai taka thawk turin a fuih bawk. ZIDCO Office a tlawhna ah hian Chief Minister chuan PSU changtlung tak State in a neih chu a pawimawh thu sawiin, State Budget bakah sawrkar laipui chuan State ten hmasawnna hna an thawhna tur suma ruahman thin thahnem tak chu state tam takin an hman tangkai tawk loh thin thu a sawi a. Heng sum hi hmang tangkai tur chuan ram tihhmasawnna tur project tha tak siam in, chung Project an lo pawmsak te chu a thawhna tur sum chu state sawrkar department kaltlangin emaw, Central Public Sector Undertaking (PSU) kaltlangin emaw pek thin a nih thu a sawi a. Chutiang chuan ZIDCO pawh hman tangkai a nih theihna turin Chief Minister chuan Industry mai bakah Infrastructure khawih thei turin hmalak a nih tak thu a sawi bawk.
He hunah hian ZIDCO Chairman, Lalthlangliana chuan State Planning Board rawtna angin ZIDCO chu Infrastructure (Construction works) lam khawih thei tura duan thar a nih dan te, a hmingah pawh ‘Zoram Infrastructure and Industrial Development Corporation Ltd.’ ti a thlak in June 4, 2020 khan Companies Act hnuaiah Ministry of Corporate Affairs in a pawmpui thu a sawi a. Industrial Development mai ni lovin Infrastructure Development pawh ZIDCO chuan a thawh theih tawh dawn avangin tunah hian Engineering Wing pawh tihlen tura hmalak mek a nih thu a sawi bawk.
ZIDCO Managing Director, Lalramsanga Sailo IRS pawhin he hunah hian an hmalakna te sawiin, ZIDCO chu Loan financing ah mi in an hriat tam berna a nih thu leh mi 4961 hnenah loan cheng vbc. 45.76 lai a pekchhuah tawh thu a sawi a, heng te avanga Mizoram pumah chhungkaw tam takin eizawnna hlawhtling tak an neih phah tawh thu a sawi bawk a. ZIDCO hian tunhma atangin Construction Works engemaw zat thawkin Central Ministry hnuaiah cheng vbc. 40 hu an thawh tawk a, kumin April thla atang khan Mizoram-ah Buhfai Supply hna pawh an thawk leh bawk a ni.
ZIDCO hi kum 1978 a din niin, Mizoram-a Corporation upa ber a ni a, tunah hian Chairman leh Managing Director hovin thawktu 40 an awm a. Branch Office pakhat, Lunglei-ah a nei bawk. ZIDCO hian Financial institution hrang hrang heng- SIDBI, NMDFC leh HUDCO atangin vbc 37.69 la-in Industry din nan leh sumdawnna atan loan a pe chhuak thin a ni.

Comments

Chhiar Hlawhte