Sample 15 thawn leh a ni

Nimin khan Serchhip atangin Swab Sample 15 te chu enfiah tura thawn leh niin nizan khan result pawh hriat nghal tura ngaih a ni. Serchhip CMO Office atanga thu kan dawn danin Serchhip District chhung inkhunghranna hmun hrang hranga inkhunghrang mi 15 te Swab Sample chu nimin khan enfiah turin ZMC Laboratory-ah thawn a ni a, heng zingah hian Serchhip leh Thenzawl-a COVID-19 hri kai enkawllai te Sample pawh telin an zinga thenkhat hi chu hri an kai tawhlo a nih chuan chhuahtir theih tawh tura beisei a ni.

Nimin thleng khan Serchhip District-ah inkhunghrang mi 80 an la awm mek a, mahni In lama inkhunghrang mi 45 te chu nimin khan chhuahtir vek niin mahni In lama inkhunghrang an awm ta lova, sawrkar in inkhunghranna tur a siam-ah mi 6 inkhunghrang awm tharin sawrkar hmunhma ah mi 64 an inkhunghrang mek a, Tourist Lodge, Serchhip-ah mi 11, P&E Rest House, Bukpui-ah mi 7, Sainik School Chhingchhip-ah mi 12, Tourist Lodge, Thenzawl-ah mi 11 leh Eklavya Model Residential School, Serchhip-ah mi 23 an inkhunghrang mek a, Dedicated COVID Health Centre (DCHC)-ah mi 5 leh COVID Care Centre (CCC)-ah mi 11 an inkhunghrang mek a ni.