Chanchin thar thenkhat :

Minister in Zokhawthar tlawh

School Education Minister, Lalchhandama Ralte chuan nimin khan Zokhawthar tlawhin tun-hnaia lirnghing in School Building leh Biak In a tihchhiat bakah zirna hmunhma te a tlawh a. He hunah hian Minister chuan tunhnaia lirnghing avanga chhiatna an tawhah Mizoram mipui leh sawrkarin a tuarpui takzet tih sawiin, Biak In hial thiah ngaite chuan mipui thinlung a khawih tak meuh tih a sawi a. Sawrkarin hmasawnna hna thawh tak tak tumin kumin kumtir atangin ruahmanna a siam a, Budget Session pawh February thla ah neih a ni a, SEDP lamah pawh a tak taka ke pen tuma ruahmanna siam anih laiin COVID-19 in min tibuai ta a, sawrkar hmachhawpte chu a chawl leh ta a ni, a ti bawk.

VC thar siam tumna duhlo
Mizoram sawrkar in tunhnaia Hnahthial South-III Village Council a siam thar chu Hnah-thial Lungleng Veng JAC chuan an Veng then-darh tumna nia hriain an duhloh thu sawiin, nimin khan Village Council thar siamna tur Notification Copy chu an hal bakah thalai mi 50 rual te chuan chaw nghei an tan nghal tih an sawi a. Nimin vek khan Lungleng Veng JAC hian thu-thar thehdarhtute kawmin Lungleng Veng then-darh anih dawn ai chuan Hnahthial South-III Village Council hnuaia Lungleng Veng pumpui awm vek an duh thu sawiin, Village Council Electoral Roll thar tihchhuah a nih hma ngeiin an har-satna te sawrkar in ngaihthlak sak se an duh thu an sawi bawk.

Journalist boral ralna hlan
Nikum July 11-a boral, Richard Lallawm-zuala (Patea), Editor Zoram Tlangau chu nimin khan a chhungte hnenah Mizoram sawrkar ralna sum (ex-gratia) cheng nuai khat bakah a damloh chhunga a inenkawlna senso phuhruk nan cheng nuai khat, a vaiin cheng nuai hnih chu Mizoram Journalist Welfare Society kaltlangin hlan a ni a, sum hlanna hun hi I&PR Director, Lallianpuii hovin a Pisa-ah neih a ni.

Lok Sabha MP in hma la
Lok Sabha MP, C. Lalrosanga chuan nimin Mizoram-a COVID-19 hripui laka invenna leh sipai duty dan chungchangah Mizoram bialtu Silchar-a BSF Inspector General, Sunil Kumar leh DIG, Kuldeep Singh chu bia in an sipaite Mizoram chhunga an luh dan leh an khunghran danah fimkhur lehzual turin a hrilh a. BSF hotute chuan an sipai Mizoram a rawn lut turte an khuahkhirh bakah Swab Test tih tir hmasak zel an nih tur thu leh uluk taka inkhar-khipna tur ruahman a nih thu a sawi bawk. Lok Sabha MP hian Assam Rifles DIG, Brig. Vinod pawh biain Champhai vela Assam Rifles sipaite chetdan chungchang a sawipui a, mipuite lungawilohna te chhui chiang tur leh harsatna an taw hte titawp turin a hriattir bawk a ni.

Senso tur sawihona nei
Nimin khan Chief Secretary, Lalnunmawia Chuaungo kaihhruaina hnuaiah Home Department leh District hrang hranga District Magistrate te chuan Quarantine Centre a awm man chawi dan tur leh COVID-19 Test senso phuhruk dan tur chungchang sawihona Video Conference hmangin an nei a, he hunah hian Chief Secretary chuan heng senso intum turte hi Sawrkar sum tuakna tura tih a ni lo tih sawiin, Sawrkar in sum tam tak a lo sen ral tawh avangin Quarantine leh Covid Test senso tum thei tena sawrkar sum sen tur an phuhrukna tur chauh a ni tih a sawi bawk. He hunah hian tangkhang ten Vai-rengte leh Bairabi an rawn paltlang hun tur siam chungchang pawh sawiho a ni bawk.

Sports Ambassador-ah puang
Infiamna lama Mizoram ti hmingthatu Jeremy Lalrinnunga leh Lalremsiami te chu Mizo-ram University Sports Ambassador atan ruat an ni. Mizoram University hian Youth Olympics mipa kg. 62 Category a Rit inchawisiak-a India tana a hmasa ber ni tura Gold Medal latu Jeremy Lalrinnunga leh Hmeichhe Hockey intih-siakna hrang hranga Mizoram leh India lo ti hmingtha tawhtu, Lalremsiami te chawimawina hun nimin khan hmangin Mizoram University Sports Ambassador atan an puang a, heng mite hian MZU leh PUC-ah te an duh a nih chuan zirna senso tum ngai lovin a thlawnin an zirna an chhun-zawm thei dawn a ni.

Comments

Chhiar Hlawhte