DM&R Minister in Central YMA kutah Bolero Camper leh chhanchhuahna hmanrua a hlan

Disaster Management & Rehabilitation Minister, Lalchamliana chuan nimin khan Central YMA hnenah Bolero Camper pakhat leh rikrum thila chhanchhuahna hmanrua (Rescue Equipment) a hlan.
Heng bungrua hlanna puala inkhawm tawi Mizoram Secretariat Building No.1 kawtzawl-a neih chu Chief Secretary, Lalnunmawia Chuaungo chuan kaihruaiin he hunah hian DM&R Minister chuan Central YMA chu rikrum thila Mizo mipuite kut leh ke, tha leh zung, chhiatni thatni a Mizo mipui te tuamhlawmtu an ni tih sawiin, “Mizo khawtlang tan YMA pawimawhna hi a tawp thei ngai dawn lo,” a ti.
DM&R Minister chuan YMA leh sawrkar chu pheikhai rual takin kawng tinrengah an thawkho thin tih sawiin, ramin harsatna chi hrang hrang a hmachhawn mekah pawh YMA chu pawl tangkai leh thawhhlawk, lirnghing-in a tihbuai mekte thlamuanpui, COVID-19 laka mipui himna tura hmalatu pawimawh a ni, tiin Mizoram Chief Minister, Zoramthanga hmalakna in rikrum thila hman tangkai theih tur hmanrua te chu YMA ten Mizoram tana tangkai taka an hman atan sawrkarin a pe tih a sawi a ni.
Central YMA President, Vanlalruata chuan rikrum thil-a chet chhuah pui tur, mi bo leh tuitla zawn nan YMA chuan hmanrua a neih that tawk loh avanga sawrkara dilna a thlen te ngai pawimawha hmanrua engemaw zat pek an ni ta chu lawmawm a tih thu sawiin,Central YMA tan chauh ni lo, Mizo mipui tana sawrkar in heng hmanrua te phal taka a pe chu lawmawm a tih thu a sawi bawk.
Nimin a bungraw hlan te hi Bolero Camper pakhat, hruihrual meter 50 a sei Coil hnih, Pulley pahnih, hrui-a uaina atana hman chi Full Body Harness pahnih, Carabineer pathum, Figure of 8 pathum, Ground Sheet panga, Four Fold Stretcher pakhat, Pelican Search Light (model : 9410L) pakhat leh Rain Coat sawmthum (30) a ni.

Comments

Chhiar Hlawhte