Chanchin thar thenkhat :

CM in lungphum a phum
Aizawl Armed Veng-a 1st MAP Football Ground siamthat a Synthetic Football Turf phahna tur lungphum chu nimin khan Chief Minister, Zo-ramthanga chuan a phum a, Chief Minister chuan Sports a hmasawnna chu ram leh mipui hma-sawnna leh changkanna tehfung pakhat a nih thu sawiin, Mizoram in khawvel huap pawha lang thei infiammi chhuanawm tak tak a nei belh zel chu lawmawm a tih thu a sawi bawk. 1st MAP Football Ground hi Football Stadium puitlinga siamna tur Master Plan siam zawh tawh niin a vaia sum ruahman chu cheng vbc. 46.35 a ni a, mi 5000 vel lenna Pavilion/Gallery bakah Basement chhawng li (4) a awm a, lirthei dahna te, mi 200 riah theihna tur Dormitory, Guest Room leh eirawngbawlna leh eina hmun bakah Gymnasium Room leh Chokidar Quarters te a awm dawn a, Synthetic Football Turf phah a ni bawk ang.

P&E Minister in Saitual tlawh
P&E Minister leh Tawi bialtu MLA, R. Lal-zirliana chuan nimin khan Saitual tlawhin MSU Sub-Hqrs. Saitual hawnna leh HSLC leh HSSLC Exam-a zirlai tithate chawimawina hun chu a hmanpui a, he hunah hian P&E Minister chuan zirlaite pass thar te chu nun bul tan an nih hre reng tur leh an hlawhtlinna chu chapo nan emaw, midang chunga leng anga inngaihna atan emaw hmang lo turin a chah a. An mizia-a a thalai theuh vawng nung zel tur leh thudik tantu, thu diklo leh belhchian dawllo vawrhdarh laka inveng thiam turin a chah bawk. He hunah hian HSLC Distinction leh First Division a pass mi 35 leh HSSLC Distinction leh First Division a pass mi 34 te hnenah lawmpuina hlan a ni.

Sesawng-ah NH. 150 dang
Sesawng Joint NGO Co-Ordination Committee chuan nikum-a an VC kaihhruaina hnuaia VC thenhran rihloh an rel hnuah an khaw VC then tumna a awm nia sawiin, hemi duhloh lantirna atan hian nimin tlai dar 4:00 thleng khan an khaw paltlangtu NH. 150 chu an dang.

Party induhsak ah puh
Mizoram Pradesh Congress Committee (MP-CC) chuan MNF sawrkarah mawi leh mawi lo pawh dawn lova party mi induhsakna a nasa leh ta hle tih nimin khan thuchhuah siama tarlangin, MNF sawrkarin National Food Security Act (NFSA) hnuaia buhfai man tlawma la thei tur thlangtu tur, Beneficiary Selection Committee-a Secretary leh Prominent Citizen pahnih tal ruat tur tihah MNF Unit hruaitu tam tak ruat an ni tih an sawi a, heng te hi siamthat leh an phut thu an sawi bawk.

Edn. Minister in tlawh
School Education Minister, Lalchhandama Ralte leh C. Lalmuanpuia MLA te chuan nimin khan Thenzawl tlawhin SDEO Office leh PIG-FED hmun te an tlawh a, Thenzawl khawtlang hruaitu, VC leh MNF Party hruaitu ten lo kawmin Thenzawl leh a chhehvel khuaa zirna kawnga mamawh leh hmasawnna tur hrang hrang an lo thlen a, heng zingah hian Thenzawl-a SDEO nghet dah an duh thu leh zirtirtu indaihlohna te telin Minister hian hmalakna te a hrilhfiah bawk.

Zirna In la khar turin ti
Ministry of Home Affairs chuan niminpiah khan inkharkhip phelh thawh 3-na, Unlock 3 kaihhruaina tichhuakin thla thar August thla chhung rampumah Zirna In la khar chhunzawm turin a ti a, kawng tam takah inthlahdulna siamin zan lam Curfew pawh telh a ni tawhlo bawk a ni.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn