Serchhip-ah hri kai 2 hmuh belh an ni; Chhingchhip-ah Total Lockdown titawp thung

Niminpiah khan ZMC Laboratory-ah Serchhip atanga Swab Sample thawn 12 enfiah niin hri kai hmuhchhuah 2 an awm a, heti hian Serchhip District-ah hri kai hmuhchhuah 7 an awm ta a ni.
Serchhip CMO Office atanga thu kan dawn danin niminpiah-a Serchhip atanga Sample thawn enfiah atanga hri kai hmuhchhuah pahnih te hi tunhnaia State pawn atanga rawn haw ve ve niin pakhat zawk hi kum 29 mi, Assam Rifles sipai leh Bihar atanga rawn haw a ni a, pakhat hi kum 20 mi, Nagaland-a zin a ni thung a, Serchhip Tourist Lodge-a Quarantine lai niin an taksa a natna lanchhuahna neilo te an ni a, Serchhip Tarpi tlang SIRD hmun-a Dedicated COVID Health Centre-ah enkawl an ni ang.
Heti hian Serchhip District-ah Swab Sample 623 lakkhawm ni tawhin heng zinga 613 te chu thawn fel ni tawhin an vaiin result hriat vek a ni tawh a, Vawiin-ah Sample dang 10 te hi enfiah tura thawn leh tum niin result hriat tawh 613 atang hian hri kai 7 hmuhchhuah an ni tawh a, hri kai hmuhchhuah zinga 3 te chu enkawl dam ni tawhin tunah hian hri kai enkawllai mi 4 an awm mek ta a ni.
Tun dinhmun ah Serchhip District-ah hian COVID-19 hri leng avanga inkhunghrang mi 218 an awm mek a, heng zinga 72 te hi Sawrkar hmun siam, Govt. Quarantine Facility-a inkhung-hrang niin midang 142 te chu In lama inkhunghrang an ni a, Dedicated COVID Health Centre-a inkhung-hrang mi 4 an awm mek bawk a ni.
Hetihlai hian Chhingchhip Venghlun VLTF in tunkar Thawhtanni atanga an khuaa Total Lockdown an kalpui chu nizan hmasa atang khan tihtawp nghal a. Tarlan tawh angin tunhnai khan Chhingchhip-a mi pakhat chuan Chhiahtlang Highway Restaurant-a Sipai Quarantine lai pakhat chu alo kawm tih hriatchhuah a nih avang leh he mi hian Chhingchhip-a mi thenkhat a lo tlawhpawh tawh avangin tunkar Thawhtanni atang khan Chhingchhip Venghlun VLTF hian an khua ah Total Lockdown puangin hetianga lo intlawhpawh chhungkaw 11 te pawh enthlak zui turin Home Quarantine nghal an ni a, amaherawh chu niminpiah-a Serchhip atanga Swab Sample enfiah zingah an khaw mi in alo tlawhpawh, Highway Restaurant ami hian hri a kai lo tih finfiah a nih tak avangin heng chhungkaw 11 te khunghran hun pawh hi tihtawp nghal a ni a, an khuaa Total Lockdown an kalpui mek pawh an titawp ve nghal a ni.

Comments

Chhiar Hlawhte