Serchhip District-a inkhunghranna man chawi dan tur bithliah fel a ni

Mizoram sawrkar in Mizoram State pawn atanga rawn haw te an inkhunghranna leh ei leh in senso mahni intum tawh tura a tih angin Serchhip District-a he ruahmanna kalpui dan tur chu nimin khan Serchhip-ah District Bawrhsap hova sawiho a ni.

Serchhip DC Meeting Room-a he sawihona hunah hian Serchhip District Bawrhsap, Kumar Abhishek IAS chuan tunhnaia Mizoram sawrkar in hri leng avanga Mizoram-a rawn haw te inkhunghranna kalpui mekah inkhunghranna senso mahni intum tawh tura ruahmanna a siam thu sawiin, hemi kalpui dan tur sawiho tura he thutkhawm hi kalpui a nih thu a sawi a. Serchhip SDO (Sadar) C. Lalduhzuali chuan hemi atana sawrkar in Notification a tihchhuah tak chu tarlangin hemi hnu hian Serchhip District-a he ruahmanna kalpui dan tur hi sawiho a ni.

Mizoram sawrkar in ruahmanna a siam dan chuan Mizoram-a rawn lut te hi Category 5-ah then niin Category A-ah hian Mizoram mi leh sa, State pawna hna nghet ni lo thawk (migrant worker a chhiar), an hna atanga an thlawn avanga la tangkhang, July 31, 2020 ralhma a Mizoram-a lo haw leh chhan dang vanga COVID-19 lockdown hma atanga Mizoram pawna awm, tun thla ni 31 ralhma a Mizorama lo haw, sum leh paia harsatna tak tak nei, Deputy Commissioner te’n an hriatpuite leh inentira zinchhuak (medical referred case) te awmin Sawrkar quarantine facility a awm te enkawl dan kal mek anga enkawl an ni ang.

Category B chuan Mizoram mi leh sa leh hnamdang, Mizoram chhunga cheng te zawng zawng huamin heng mite hi a tlem berah ni 14 chhung Sawrkar Quarantine Facility buatsaih ah an awm a ngai dawn a. Ei leh in man nikhat ah Rs. 300/- zel intum ngaiin inkhunghranna hmuna an awm chhunga an chawi ngai chu Rs. 4200/- a ni anga, hei hi an duh chuan an chhung ten ei leh in hi an pe thei dawn thung a, thlen man erawh chawi ngei ngei tur niin Serchhip District-ah hian Deluxe Room awm lovin Serchhip leh Thenzawl Tourist Lodge te chu Standard Room niin zan khat riah man Rs. 200/- a ni anga, hmundang zawnga Quarantine Facility te chu Ordinary Room niin zankhat riahna man Rs. 100/- a ni thung anga, COVID-19 Test-na man erawh Laboratory lam in an bituk tur a ni thung dawn a ni.

Heng bakah hian Category C in Mizo-ram pawn lam mi, an hnathawhna avanga lo zin ngai te, Central Sawrkarin Official duty a a rawn tirh te leh Mizoram Sawrkar, company, pawl leh mimal te’n an mamawh avanga mithiam bik an chah chhuah, hun reilote cham tura rawn zinte a huam anga. Sawrkarin an awmna tur bik Hotel emaw, thlenna dang a ruahman ah chauh an thleng thei anga, an thlenman leh ei leh in man, veivahna leh COVID-19 test-na man te chu anmahni emaw, anmahni chah chhuaktu te’n an tum ang.

Category D-ah hmasawnna ruhrel siam hna (infrastructure development project) kallai avanga Public Sector Undertaking, Construction Company leh Contractor ten Mizoram pawn lam atanga hnathawktu tur an chah chhuahte a huam anga, an hnathawhna hmunah in quarantine-na tur remchang a awm a nih chuan an awmna Deputy Commissioner te hriatpuinain ni 14 chhung an in quarantine anga, Quarantine-na hmun an neih loh chuan Category B anga kalpui tur a ni ang.

Hei bakah hian Category E siam niin mahni senso a nuamsa deuh zawka ni 14 chhung quarantine a awm duh te tan niin an awmna tur Hotel emaw thlenna dang Deputy Commissioner te’n an ruat lawkah chauh an awm thei anga, an thlen man leh ei leh in man chu rate bithliah sa anga kalpui a ni anga, hemi chhung hian midang tan an thlenna a thlen ve a remlo thung ang.