Serchhip District-a Truenat Quattro RT-PCR khawl bunna tur buaipui mek a ni

Mizoram sawrkar in Mizoram District tina COVID-19 hri kai te enfiahna tur khawl, Truenat Quattro RT-PCR bun tuma hma a lak mekna ah Serchhip District-ah pawh he khawl dahna tur hmun buaipui mek a ni.
Serchhip District Medical Superintendent, Dr. ZD. Lalmuanawma hnen atanga thu kan dawn danin Mizoram sawrkar chuan tunlai-a COVID-19 hri leng mek avang hian Mizoram District tinah Truenat Quattro RT-PCR hi bun tumin hma a la mek a, he khawl bunna tur atan hian tunhnai khan Serchhip-a Health Department thuneitute chu an dinhmun zawtin Laboratory an neih mek chu hman chhunzawm theih a nih leh nihloh an rawn zawt a, Serchhip in Laboratory a neih mek chu a hmun a zim avang leh khawl dang han dah belhna chi a nih loh avangin sawrkar hotute thu angin an building neih lai zinga remchang chu he khawl bunna atan hian ruahman a ni ta a ni.
He khawl bunna atan hian pindan hrang hrang panga (5) mamawh a ni a, Serchhip District Hospital OPD Building hnuai-a bungrua dahkhawmna atana an hman, tunhmaa X-Ray Room atana an hman thin Pindan thenkhat chu he khawl bunna atan hian ruahman niin kar hmasa tawplam khan an bungrua dah te lachhuakin tunkar Thawhtanni atang khan Pindan thuamthat hna hi thawh a ni a, heng hna hrang hrangte hi tluang taka thawh a nih chuan karleh chhunga peihfel hman vek tum niin hmanraw mamawh ang turte pawh Order a nih tawh thu an sawi. He khawl bunna tur atana Pindan siamna atan hian sum ruahman sa a awm loh thu leh a tul tul thawkin a siamna senso chu thuneitute hnena thehluh leh tur a nih thu Hospital thuneitute chuan an sawi bawk.
Tarlan tawh thin angin TrueNat khawl hi COVID-19 hrik chauh ni lovin, TB, HIV, Typhoid leh natna chi hrang hrang 16 lai test nan a hman theih niin Mizoram sawrkar chuan Mizoram District tinah bun tumin hma a la a, Swab sample endikna khawl tê chi, Truelab Quattro Real Time Quantitative Micro PCR (Truenat) 10 leina atan hian Chief Minister's Office (CMO) chuan July 2, 2020 khan CM Relief Fund atangin Rs. 2,01,15,000/- a pechhuak a. Hemi hnu July 17 khan Mizoram District 10-a Truelab Quattro Real Time Quantitative Micro PCR Machine (Truenat) leh a kaihhnawih hmanraw hrang hrang lei nan Chief Minister's Relief Fund atangin Rs. 1,18,68,830/- chu pekchhuah leh niin Health Department Account-ah pawisa hi thun nghal a ni.

Comments

Chhiar Hlawhte