Serchhip-ah thlai vawnthatna tur 'Satellite Cold Room' hman theih a ni ta

Kuthnathawktute thlai tharchhuah vawnthatna tura Horticulture Department in an ruahman, Serchhip-a 'Satellite Cold Room' chu hman theiha peihfel a nih hnuah nimin khan thlai thar dahluta hman tan a ni.
Serchhip Sailiamkawn-a Horticulture Department buatsaih 'Satellite Cold Room' ah hian nimin chawhnu khan Serchhip Center of Excellent-a tharchhuah Dragon Fruit dahluh a ni a, Serchhip Divisional Horticulture Officer, M. Vanlalzami chuan thlai chingtute thlai chin chu a tharchhuah chhung a reiloh thin thu leh hemi chhung hian a man pawh nasa taka a tlakhniam thin avangin kuthnathawktu ten harsatna an tawh thin thu a sawi a, he khawl hman theih a nih hnuah hi chuan thlai chingtute tharchhuah chu helai hmunah hian tha taka vawngin reilote hnuah man man zawka hralhchhuah zel theih a nih tawh a beisei thu a sawi a. He thlai vawnthatna hmun hi kuthnathawktute tana ruahman a nih angin tunah chuan a mamawh apiang te tan hman theih a nih tawh dawn thu a sawi bawk.
Hri leng avanga Mizoram-a inkharkhipna kalpui a nih hnu, May 1, 2020-a Chief Minister, Zoramthanga hova Vegetables and Fruits Supply Chain chungchanga hmalakna te thlirhona neih khan Serchhip-a Cold Storage sak zawh tawh chu tihnun thuai turin an rel a ni a. Hemi ang hian sawrkar chuan hma la zuiin tunah chuan hman theiha peihfel a ni ta a ni. Serchhip-a 'Satellite Cold Room' hi Mission for Integrated Development of Horticulture (MIDH) sum cheng nuai 50 hmanga siam niin RINAC India Limited ten a siam hna hi thawkin P&E Department in Electric Transformer bunin Connection an thlung a, helai hmunah hian thlai vawnthatna tur hmun (Chamber) pathum siam niin Chamber pakhat-ah hian thlai chi hrang hrang MT 3 zel, a vaiin tum khat ah thlai MT 9 vawnthat theih tura ruahman a ni.
He khawl hman dan tur chungchanga zawhna chhangin Serchhip DHO chuan kuthna-thawktu tu pawhin he khawl hi an hman theih thu leh a hmangtute chuan Electric Bill erawh an chawi tur thu a sawi a, Serchhip-a P&E Department hotute nen pawh inbiakna neiin Agriculture Product vawnthatna atan chuan Electric Bill hi tlawm zawka tih theih a nih thu leh hemi ang hian Power hman man pawh hi chawi tura beisei a nih thu a sawi bawk. Serchhip DHO chuan thlai leh thei tharchhuah te chu a that dan thliarna (Grading) pawh kalpui a pawimawh thu sawiin, tuna an thlai dahluh hmasak te pawh mumal taka a Grade siamin a tharchhuak tha te chu man to zawka hralhchhuah a nih tur thu a sawi bawk.

Comments

Chhiar Hlawhte