Lok Sabha MP in Aizawl-a BSNL Office a tlawh

Mizoram Lok Sabha MP leh Telephone Advisory Committee (TAC) Chairman, C. Lalrosanga chuan nimin khan Aizawl-a BSNL Office tlawhin, BSNL Staff ten an dinhmun leh an harsatna te an lo thlen.

Nimin-a Lok Sabha MP in BSNL hmun tlawha thawktute a kawmna ah hian BSNL-a thawktute chuan General Manager, Dy. General Manager leh Asst. General Manager te Mizoram-ah an awm tak loh avanga hnathawh a harsat dan te, BGN Router an neih loh avanga FTTH, Broadband leh Data Service dang a muan phah thu te, Aizawl leh Shillong inkar Bandwidth pawh nasa taka mamawh a nih thu te, Development leh maintenance hna chi hrang hrang atan BSNL, Mizoram hian tunhnaiah Fund a hmuh that loh avanga harsatna awm te bakah BSNL hnuaia contract-a hnathawk te rei tak hlawh an lak theih loh avanga an mangan thu te, Staff 40 lai mai Voluntary Pension a kaltir an nih avanga hnathawktu an indaihloh thu te an lo thlen a ni.

He hunah hian Lok Sabha MP chuan heng an harsatna hrang hrang an sawi te chhinchhiahin, a rang thei ang berin a tulna ang angah hma a lo laksak nghal tur thu a sawi a, BGN Router pawh rang taka an neih theih nan hmalak nghal a ni ang, a ti a. An in relbawlna leh hlawh chungchanga an harsatna leh an mamawh ang te theihtawp chhuaha a lo bawhzui dawn thu leh a tul leh mamawh apiang chu a hnen a thlen hreh lo turin BSNL Staff te hi a chah a. An harsatna hrang hrang an sawite chu chinfel a nih theih nan remchang hmasa bera Union Minister for Electronics and Information Technology and Communications, Ravi Shankar Prasad hnena thlen a tum thu leh Parliament-ah pawh zawhna zawh a tum thu a sawi bawk a ni.

Nimin-a BSNL hmun tlawhtu Lok Sabha MP leh TAC Chairman, C. Lalrosanga hi TAC Member thar, Biak Thansanga, Lalliankima, Dr. JC. Zomuanthanga, H. Vanlalrawna leh H.C. Vanlalruata ten an tawiawm a ni.